මාස දෙකක් තුළ දරුවන්ට එරෙහි ශාරීරික දඬුවම් පිළිබඳ පැමිණිලි 11,000 ඉක්මවයි

ඡායාරූපය: © 2017 Marco Tibasima for Human Rights Watch

ශ්‍රී ලංකාවේ දරුවන්ට එරෙහි ශාරීරික දඬුවම් සහ අතවර සිදුවීම් තවදුරටත් විශාල සමාජ ගැටලුවක් බවට පත්ව ඇති අතර, 2026 පෙබරවාරි 28 වනදා වන විට පමණක් දරුවන්ට එරෙහි ශාරීරික දඬුවම් සම්බන්ධයෙන් පැමිණිලි 11,409ක් ජාතික ළමා ආරක්ෂණ අධිකාරිය (NCPA) වෙත ලැබී ඇති බව එම අධිකාරිය හෙළි කර ඇත.

මෙම තොරතුරු රජයේ තොරතුරු දෙපාර්තමේන්තුවේ පැවති මාධ්‍ය හමුවකදී, ජාතික ළමා ආරක්ෂණ අධිකාරියේ සැලසුම් හා තොරතුරු අධ්‍යක්ෂිකා ශානිකා මලල්ගොඩ විසින් ප්‍රකාශ කරන ලදී. ඇය සඳහන් කළේ 2025 වසර තුළ පමණක් දරුවන් සම්බන්ධ පැමිණිලි 10,455ක් ලැබී ඇති අතර, එයින් 2,099ක් දරුවන්ට එරෙහි කෲරත්වය පිළිබඳ පැමිණිලි බවයි.

ශානිකා මලල්ගොඩ මහත්මිය ජනතාවගෙන් ඉල්ලා සිටියේ, දරුවන්ට එරෙහි කිසියම් අතවරයක් හෝ ශාරීරික දඬුවමක් පිළිබඳ දැනගතහොත්, වහාම ඒවා වාර්තා කරන ලෙසයි. ඇය අවධාරණය කළේ, 1929 දුරකථන අංකය හරහා පැය 24ම නොමිලේ පැමිණිලි ඉදිරිපත් කළ හැකි බවත්, ඉක්මන් වාර්තාකිරීම දරුවාගේ ජීවිතය හා අනාගතය ආරක්ෂා කිරීමට අත්‍යවශ්‍ය බවත්ය.

දණ්ඩ නීති සංග්‍රහය සංශෝධනය කිරීමට යෝජනා

එම මාධ්‍ය හමුවේදී අදහස් දැක්වූ ජාතික ළමා ආරක්ෂණ අධිකාරියේ නීති අංශ ප්‍රධානී හා නීති අධ්‍යක්ෂිකා ප්‍රීතිකා සකලසූරිය මහත්මිය, දරුවන්ට එරෙහි ශාරීරික දඬුවම් වැළැක්වීම සඳහා දණ්ඩ නීති සංග්‍රහයට (Penal Code) සිදු කිරීමට යෝජිත සංශෝධන කිහිපයක් පිළිබඳ පැහැදිලි කළාය.

ඇය සඳහන් කළේ, දරුවන්ට එරෙහි කෲරත්වය සම්බන්ධ 308A වගන්තිය යටතේ දැනට භාවිතා වන “wilfully” (ඉච්ඡාපූර්වකව) යන වචනය, “intentionally” (අරමුණින්) ලෙස වෙනස් කිරීමට යෝජනා කර ඇති බවයි. මෙම වෙනස මගින් නඩු පැවරීමේදී වරද සනාථ කිරීම වඩාත් පහසු වන බව නීති අංශය පෙන්වා දී ඇත.

ඒ සමඟම, “දරුවන් සම්බන්ධ ශාරීරික දඬුවම්” යන නව වගන්තියක් දණ්ඩ නීති සංග්‍රහයට එක් කිරීමට යෝජනා කර ඇති බවත් ඇය පැවසීය. මෙම නව වගන්තිය යටතේ:

• දරුවෙකුට වේදනාවක් හෝ අපහසුතාවයක් ඇති කරන ඕනෑම ශාරීරික ක්‍රියාවක්

• දරුවාට අපහාසයක් හෝ ලජ්ජාවක් ඇති කිරීම අරමුණු කරගත්, ශාරීරික නොවන ක්‍රියාවන්

දඬුවම් ලෙස හෝ “නිවැරදි කිරීමක්” ලෙස කළද සම්පූර්ණයෙන්ම තහනම් කිරීමට යෝජනා කර ඇත.

මෙවැනි වරදක් සිදු කළහොත්, මාස 6ක් දක්වා සිරදඬුවමක් හෝ රුපියල් 10,000 දක්වා දඩයක් හෝ දෙකම පැනවිය හැකි බවද සඳහන් විය.

දරුවන්ට එරෙහි තුවාල සිදුකිරීම් සඳහා දැඩි දඬුවම්

තවද, දණ්ඩ නීති සංග්‍රහයේ 314 හා 316 වගන්ති (තුවාල හා බරපතළ තුවාල සිදුකිරීම) සම්බන්ධයෙන්ද සංශෝධන යෝජනා කර ඇති අතර, දරුවෙකුට එවැනි තුවාල සිදුකළහොත්, අවුරුදු 10ක් දක්වා සිරදඬුවම් පැනවිය හැකි ලෙස දඬුවම් දැඩි කිරීමට යෝජනා කර ඇත.

එසේම, “හොඳ විශ්වාසයෙන්” දරුවන්ට ශාරීරික දඬුවම් දීමට ඉඩ සලසන 82 වගන්තිය සංශෝධනය කර, එවැනි ඉඩනඩ ඉවත් කිරීමටද යෝජනා කර ඇත.

රජයේ පියවර හා නීතිමය ප්‍රගතිය

මෙම යෝජනා, 2025 දී පාර්ලිමේන්තුවට ඉදිරිපත් කර ඇති දණ්ඩ නීති සංග්‍රහ සංශෝධන පනත් කෙටුම්පතට අනුකූල වන අතර, එය අධීක්ෂණ කමිටුවක අනුමැතියද ලබාගෙන ඇත.

රජය පෙන්වා දෙන්නේ, මෙම නීති සංශෝධන ගුරුවරුන් හෝ දෙමාපියන් ඉලක්ක කරගත් නොවන අතර, දරුවන්ට එරෙහි අතවර, කෲරත්වය හා අපහාසයන් සම්පූර්ණයෙන්ම නවතා දැමීමේ අරමුණින් යුක්ත බවයි.

සමාජ ගැටලුවක් ලෙස ශාරීරික දඬුවම්

නීතිමය පියවර ගෙන තිබුණද, දරුවන්ගේ අයිතිවාසිකම් සම්බන්ධ සංවිධාන පෙන්වා දෙන්නේ, ශාරීරික දඬුවම් පිළිබඳ සමාජයේ තවමත් කා වැදී අදහස් වෙනස් කිරීම අත්‍යවශ්‍ය බවයි. නීතිය පමණක් නොව, දෙමාපියන් හා ගුරුවරුන් සඳහා දැනුවත් කිරීමේ වැඩසටහන්, සාමකාමී දරුවන් හැසිරවීමේ ක්‍රම, සහ සමාජ මට්ටමේ අධ්‍යාපනය ද අත්‍යවශ්‍ය බව ඔවුන් අවධාරණය කරයි.