මිදිගම චූටිට එරෙහිව ජාත්‍යන්තර පොලීසිය මඟින් රතු නිවේදනයක් පවා නිකුත් කර ඇත. ඒ අනුව ඕමාන පොලීසිය මඟින් පසුගිය ජුනි මාසයේදී ඔහුව අත්අඩංගුවට ගෙන තිබේ. ඔහුව අත්අඩංගුවට ගැනීමෙන් අනතුරුව ඒ බව ජාත්‍යන්තර පොලීසිය මඟින් ඕමාන පොලීසිය මෙරටට නිල වශයෙන්ද දැනුම්දී තිබී ඇත. ඔහුට එරෙහිව එරට අධිකරණයේ නඩුවක් පවතින බැවින් නඩුව අවසන් වීමෙන් අනතුරුව මෙරටට භාරදෙන බවද දැනුම්දී තිබී ඇත. මිදිගම චූටි විසින් මෙම ඝාතන සැලසුමට සම්බන්ධ වී ඇතැයි හෙළි වන්නේ ඔහු ඕමාන් අත්අඩංගුවේ සිටියදීය. වැලිගම සභාපතිවරයාගේ ඝාතනය මෙ‍ෙහයවීමට ඔහු සම්බන්ධ වූ බව සඳහන් දුරකතන අංක ද මේ වන විට අනාවරණය වී තිබේ. එම අංක ජාත්‍යන්තර පොලීසිය මඟින් ඕමානයට යොමුකර තවදුරටත් තොරතුරු සොයා බලන බව උසස් පොලිස් නිලධාරියෙක් සඳහන් කළේය.
මෙම ඝාතනය සඳහා වෙඩික්කරුව මෙහෙයවා ඇති ඩුබායි කණ්ඩායම අතර රජිත නමැත්තා මෙන්ම ඩුබායි ලොක්කා නමැත්තාද සිටින බව විමර්ශනවලින් අනාවරණය වී තිබේ. ඔවුන් දෙදෙනා වෙඩික්කරු සමඟ ඩුබායි සිට ජංගම දුරකතන අංක කිහිපයක් ඔස්සේ සම්බන්ධ වෙමින් වෙඩික්කරුව මුළුමනින්ම මෙහෙයවා ඇති බවද අනාවරණය වී ඇත. වෙඩික්කරුට මෙම ඝාතනය සඳහා ගිනි අවිය ලැබී ඇත්තේ ප්‍රාදේශීය සභාව කිට්ටුව ස්ථානයකදීය. ඩුබායි සිට ලැබුණු උපදෙස්වලට අනුව වැලිගම පිහිටි පාලමක් අසලට ගිය අවස්ථාවේදී එතැනට පැමිණි පුද්ගලයෙක් ගිනි අවිය ඔහු අතට පත්කර තිබේ. එම අවිය ඔහුට ලබාදී ඇත්තේද වෙඩි තැබීම සිදුවූ දින උදෑසන කාලයේදීය. ගිනි අවිය රැගෙන ඔහු යතුරුපැදිකරු සමඟ වැලිගම ප්‍රාදේශීය සභාවට කෙළින්ම ගමන්කර ඇත. ගිනි අවිය ලබාගත් ස්ථානයේ සිට විනාඩි 10ක් තුළ ප්‍රාදේශීය සභාවට ගොස් සභාපතිවරයාට වෙඩි තබා පලායන අතරතුර ගිනි අවිය නැවත ලබාගත් ස්ථානයේදීම රැගෙන ආ පුද්ගලයාටම භාරදී පලාගොස් තිබේ.
වෙඩි තැබූ දින ඔහු සිය මහගෙදරට ගොස් දවස එහි ගතකර ඇති බවට තොරතුරුද අනාවරණය වී ඇත. ඩුබායි සිට ඔහුට මෙම ඝාතන කොන්ත්‍රාත්තුව භාරදුන් පුද්ගලයන් විසින් එදින සවස රුපියල් ලක්ෂ 15ක මුදල ඔහු අතට ලැබීමටද කටයුතු කර ඇතැයිද විමර්ශනවලින් හෙළිවී තිබේ. ගමන් මල්ලක දැමූ එම මුදල මාතර ප්‍රදේශයේදී ඔහු අතට ලැබී ති‍‍බෙන බව සඳහන්ය.
සිය බිරිඳ සහ දරුවා රැගෙන අම්බලන්තොට බිරිඳගේ මහ ගෙදරට පසුදින ඔහු ගොස් ඇත්තේ පොලීසිය ඔවුන් පස්සේ පන්නන බැවින් පලායන ලෙස ඩුබායි සිට ලැබී ඇති උප‍‍‍‍ෙදස්වලට අනුවය.
බිරිඳගේ මහ ගෙදරට ගොස් අට හැවිරිදි දරුවා එහි දමා බිරිඳත් සමඟ වෙඩික්කරු පලායන්නේ කතරගම දෙසටය. යතුරුපැදිකරුද එහිදී මොවුන් සමඟ එක්ව ඇති අතර ඔවුන් ගමන්කර ඇත්තේ ඩුබායිවලින් ලද උපදෙස්වලට අනුවය. ගල්ගේ ප්‍රදේශයේදී අලි ප්‍රහාරයකට ද මොවුන් ලක්වීමට ගොස් ඇති බව සඳහන්ය. සභාපතිවරයා ඝාතනයට වෙඩික්කරු රැගෙන ගමන් කළ යතුරුපැදියේ පැදිකරු ගමන් කළ යතුරුපැදිය අතහැර දමා ඇත්තේ ගල්ගේ ප්රදේශයේ කැලෑබද ස්ථානයකය. එම ස්ථානයේ ලොකේෂන් එක ඩුබායි වෙත යොමුකර ඇති බවද අනාවරණය වී තිබේ. යතුරුපැදිය සොයා පොලීසිය එම ස්ථානයට පෙරේදා ගියද යතුරුපැදිය එහි තිබී සොයා ගන්නට ලැබී නැත.
යතුරුපැදිය අතහැර දැමූ පසු පැදිකරුවත් සිය බිරිඳත් ඔහු පැදවූ යතුරුපැදියේ නංවාගෙන වැල්ලවාය, රිදීමාලියද්ද, මහියංගණය, බකමූණ හරහා ගමන් කරමින් සිට ඇත්තේ අනුරාධපුරය වෙතය. ඒ යන අතර තුර ඔහු කැකිරාවේ නවාතැන් ගෙන ඇත්තේ මත්කුඩු භාවිත කිරීම සඳහාය. වෙඩික්කරු කාලයක් කැකිරාවේ නවාතැන් ගෙන සිටිමින් බැකෝ යන්ත්‍රයක සේවයේ නිරතව සිට ඇත. එහිදී දැන හඳුනාගත් වඩේ අලෙවි කරන්නෙකුට දුරකතන ඇමතුමක් ලබාදී තිබේ. එම වඩේ අලෙවි කරන්නා හමුවීමෙන් පසු ඔහුට රුපියල් 25,000ක් දී හෙරොයින් ගෙනවිත් දෙන ලෙස පවසා ඇත. හෙරොයින් ගෙනවිත් දෙන තෙක් ඔවුන්ට නවාතැන් ගැනීමට ඉඩ සලසා දී ඇත්තේ කැකිරාවේ නිවාස 50 ප්රදේශයේ ඉදිකරමින් පැවති නි‍ෙවසකය. වඩේ වෙ‍ළෙන්දා මුදල් රැගෙන ගියද නැවත පැමිණ නැත. ඒ අතර
අපරාධ පරීක්ෂණ දෙපාර්තමේන්තුවේ නිලධාරීන් විසින් දුරකතන ජාල විශ්ලේෂණයක් ඔස්සේ සැකකරු රැඳී සිටින ස්ථානය හඳුනාගෙන කැකිරාව පොලීසිය, පොලිස් විශේෂ කාර්ය බළකාය සහ යුද හමුදාවේ සහය ඇතිව ප්‍රදේශය වටකර සැකකරු අත්අඩංගුවට ගැනීමට මෙහෙයුමක් දියත්කර තිබේ. වෙඩික්කරු සමඟ වැලිගම සභාපති ඝාතනයට ගිය යතුරුපැදිකරු, වෙඩික්කරුගේ බිරිඳ සහ තවත් අයෙක් පොලීසිය අත්අඩංගුවට ගත්තද වෙඩික්කරු වන සැකකරු එම අවස්ථාවේදී පොලීසිය සමඟ පොරබදා පලාගොස් තිබිණි.
එසේ පලාගිය සැකකරු කැකිරාවේ සිට කොළඹ බලා පැමිණ ඇත්තේ ඩුබායි සිට ඔහු මෙහෙයවමින් සිටි පුද්ගලයා විසින් දුරකතනය ඔස්සේ ලබාදුන් උපදෙස්වලට අනුවය. ඔහු කොළඹ පිටකොටුවේදී රුපියල් 20ක් කමියුනිකේෂන් එකකට ලබාදී සිය ජංගම දුරකතනයද විනාඩි 20ක් තුළ ආරෝපනය කරගෙන තිබේ.
වැලිගම ප්‍රාදේශීය සභාවේ සභාපති ලසන්ත වික්‍රමසේකර මහතාගේ ඝාතනයේ වෙඩික්කරු සොයා පොලීසිය පෙරේදා (26) කොළඹ පීරමින් දැඩි සෝදිසියක් දියත් කරනු ලබන්නේ ඔහු කොළඹට පැමිණ ඇති බව දුරකතන ජාල විශ්ලේෂණ ඔස්සේ හදුනා ගැනීමත් සමඟනි. ඒ වනවිටත් ඔහු සිට ඇත්තේ දැඩි මත්ද්‍රව්‍ය අවශ්‍යතාවකිනි. අධික ලෙස හෙරොයින් පානයට ඇබ්බැහි වී සිටින්නෙක් වන ඔහුව බොරැල්ල සහස්පුරට යවා ඇත්තේද ඩුබායි සිට ඔහුව මෙහෙයවූ පුද්ගලයන්ය.
ඩුබායි සිට දුරකතන ඇමතුම් දෙමින් ඔහුව මෙහෙය වූ පුද්ගලයා බොරැල්ල සහස්පුරදී යම් පුද්ගලයෙක් ඔහුට මුණගස්සවා තිබේ. එම පුද්ගලයාගේ නි‍ෙවසට ගොස් ඔහුත් සමඟ හෙරොයින් පානය කර ඇති සැකකරු කොණ්ඩ රැවුල් කපාගෙන ඇත්තේද සහස්පුර පිහිටි සැලුන් එකකිනි. රැවුල් කොණ්ඩය කපා ස්වරූපය වෙනස්කර ගන්නා ලෙස ඔහුට දැනුම් දී ඇත්තේද ඩුබායිවලිනි. ඒ පොලීසිය ඔහු‍ෙග් ඡායාරූපය ප්‍රසිද්ධ කරමින් අල්ලන්නට සොයන බව පවසමිනි. ඒ අනුව සිය ස්වරූපය වෙනස්කර ගන්නා ඔහු පැය කිහිපයක් බොරැල්ල සහස්පුර රැඳී සිටි ඔහු සිය ජංගම දුරකතනයේ සිටි කාඩ්පත ගලවා දුරකතනය තමා සමඟ මත්කුඩු භාවිත කළ පුද්ගලයාට ලබාදී පිටත්ව ඇති බව සඳහන්ය. ඒ යන අතරතුර එම සිම්පත වෙනත් දුරකතනයකට දමාගෙන එය භාවිතකර ඇති බව කියවේ. ඔහු සතුව දුරකතන දෙකක් මුල සිටම තිබී ඇති බව ද අනාවරණය වී තිබේ.
අතරමඟදී ඔහු වෙ‍ළෙඳසැලකින් කැප් එකක් සහ අවු කණ්ණාඩියක් ද මිලදී ගෙන එය පැලඳගෙන ගමන්කර ඇති බව සඳහන්ය.
සහස්පුර පුද්ගලයාට ඔහු ලබාදුන් ජංගම දුරකතනයද පොලීසියට හමුවී ඇත. එම පුද්ගලයාව ද අත්අඩංගුවට ගෙන තිබේ. එම ජංගම දුරකතනය මෙන්ම අත්අඩංගුවට ගන්නා අවස්ථාව දක්වා සැකකරු භාවිත කළ දුරකතනය සම්බන්ධයෙන්ද වෝහාරික පරීක්ෂාවක් සිදුකරමින් සැකකරු සම්බන්ධකම් පැවැත්වූ පුද්ගලයන්ගේ මෙන්ම ඔහුව මෙහෙයවන ලද පුද්ගලයා සම්බන්ධයෙන් තොරතුරු අනාවරණය කර ගැනීමට අපරාධ පරීක්ෂණ දෙපාර්තමේන්තුව විසින් විමර්ශන ආරම්භ කර තිබේ. මෙම සැකකරු බොරැල්ලේ සිට කොට්ටාවට ගොස් එහි සිට මහරගමට පැමිණ ඇත. අනතුරුව ඔහු නාවින්නේ පිහිටි ජංගම දුරකතන අලෙවි ස්ථානයකට ගොස් පිටතට එන අවස්ථාවේදී රාජ්‍ය බුද්ධි සේවයේ පොලිස් පරීක්ෂකවරයකුට ඔහුව නිරීක්ෂණය වීමෙන් අනතුරුව කොටුකරගෙන තිබේ.
ඔහුව කොටුකර ගැනීමට ප්‍රදේශවාසීන් පිරිසක් ද සහාය දී ඇත. පලායමින් සිටි සැකකරු අල්ලා ගැනීමෙන් අනතුරුව ඒ වනවිටත් ඔහුව සොයා මහරගම හා ඒ අවට සැරිසරමින් සිටි බුද්ධි අංශ නිලධාරීන් සහ පොලිස් විශේෂ කාර්ය බළකායේ නිලධාරීන් ඔහුව අත්අඩංගුවට ගැනීමට පියවර ගෙන තිබේ. එම අවස්ථාවේදී ඔහුගෙන් ප්‍රශ්න කරන ආකාරය දැක්වෙන වීඩියෝවක් ද මාධ්‍ය ඔස්සේ ප්‍රචාරය විය. එහිදී ඔහු ඩුබායි ලොක්කා යැයි යම් පුද්ගලයෙක් ගැන සඳහන් කර තිබේ. විමර්ශනවලින් පෙනී ගොස් ඇත්තේ මෙම සැකකරුව මෙහෙයවා ඇත්තේ ඩුබායිහි රැඳී සිටින රජිත සහ ඩුබායි ලොක්කා යන අය බවය.
රටින් පලාගොස් විදේශගතව රැඳෙමින් මෙරට අපරාධ මෙහෙයවන පාතාලයේ මත්කුඩු ජාවාරම්කරුවන්‌ගේ ලැයිස්තුවේ මේ කියන පුද්ගල නාම නොමැති බව ද පොලිස් තොරතුරු අනාවරණය කළේය.
වෙස් මාරු කරගෙන සිටියත් වෙඩික්කරුව හඳුනා ගැනීමට පොලීසියට හැකියාව ලැබෙන්නේ ඒ අයි තාක්ෂණයෙන් සැකකරුගේ රූව 08ක් විවිධ ස්වරූප‍යෙන් සකස්කර ඒ හැම රූපයක් සම්බන්ධ‍ෙන්ම අවධානයෙන් සැකකරු පස්සේ පැන්නීම නිසා බව පොලිස් තොරතුරු අනාවරණය කළේය. වැලිගම සභාපති ඝාතනය වෙනුවෙන් වෙඩික්කරුට ලද රුපියල් ලක්ෂ 15ක මුදලින් රුපියල් ලක්ෂ දෙළහමාරක පමණ මුදලක් කැකිරාවේදී අත්අඩංගුවට ගත් ඔහුගේ බිරිඳ සතුව තිබී සොයාගෙන ඇත.
වෙඩි ප්‍රහාරයට යෑමට පෙර යතුරුපැදි ආරක්ෂක හිස් වැසුම්, ඇඳුම්, දුරකතන මිලදී ගැනීමටද රුපියල් 50,000ත් 100,000ක් පමණ මුදලක් වැය කර ඇති බව අනාවරණය වී තිබේ.
තවත් රුපියල් 25,000ක් කැකිරාවේදී වඩේ වෙළෙන්දාට දී ඇත. සෙසු මුදල් අතරමඟ කෑමට බීමට සහ වෙනත් කටයුතු සඳහා වැය වී ඇතැයි හෙළිවී ඇත.
( ආණ්ඩුවේ දිනමිණ පුවත්පතට ගයාන් කුමාර වීරසිංහ ලියූ ලිපියකි)
