අධිකරණ නඩු සහ විමර්ශන සම්බන්ධයෙන් අසත්‍ය ඡායාරූප සහ වීඩියෝ පළ කිරීම පිළිබඳ පොලිස් අවවාදයක්
අධිකරණ නඩු සහ විමර්ශන සම්බන්ධයෙන් සත්‍ය වශයෙන් තහවුරු නොකළ ඡායාරූප, වීඩියෝ සහ AI තාක්ෂණය භාවිතයෙන් සංස්කරණය කළ දෘශ්‍ය දත්ත විවිධ මාධ්‍ය මඟින් පළ කිරීම සම්බන්ධයෙන් ශ්‍රී ලංකා පොලීසිය අවවාදයක් නිකුත් කර ඇත.
එය ශ්‍රී ලංකා පොලිසියේ පේස්බුක් පිටුවේ සිංහල සහ ඉංග්‍රිසි බසින් දක්වා ඇතත් දෙමළ බසින් නැත.
පොලිසිය පවසන්නේ, අධිකරණයේ පවතින නඩු, ඉදිරියේදී අධිකරණයට ඉදිරිපත් කිරීමට නියමිත නඩු සහ දැනට විමර්ශනය වන සිදුවීම් සම්බන්ධයෙන් සංස්කරණය කළ හෝ නොකළ ඡායාරූප, වීඩියෝ සහ AI නිපදවූ දෘශ්‍ය දත්ත සත්‍ය තහවුරු කිරීමකින් තොරව මාධ්‍ය හරහා ව්‍යාප්ත වන බවයි.
මෙවැනි දෘශ්‍ය දත්ත බොහෝවිට මත්ද්‍රව්‍ය වැටුප්, අපරාධ විමර්ශන සහ විවාද සහගත සිදුවීම් සම්බන්ධයෙන් වන අතර, එවැනි දෘශ්‍ය දත්ත වින්දිතයින් සහ සාක්ෂිකරුවන් මත අනිසි පීඩනයක් ඇති කරමින් විමර්ශන සහ අධිකරණ ක්‍රියාවලියට බාධා විය හැකි බව පොලිසිය අවධාරණය කරයි.
ශ්‍රී ලංකාවේ රාජ්‍ය සේවා චක්‍රලේඛය අනුව, මාධ්‍යයට තොරතුරු ලබාදිය හැක්කේ අමාත්‍යාංශ ලේකම්වරයා, දෙපාර්තමේන්තු ප්‍රධානීවරයා හෝ ඔහුගේ අධිකාරිය මත බලය ලබාදුන් නිලධාරියෙකුට පමණි. ඒ අනුව, සත්‍ය සහ තහවුරු කළ ඡායාරූප සහ වීඩියෝ පමණක් පොලිස් මාධ්‍ය අංශය හරහා මාධ්‍ය ආයතන වෙත නිකුත් කරන අතර, එවැනි නිල වශයෙන් නිකුත් කළ දෘශ්‍ය දත්ත සම්බන්ධයෙන් සම්පූර්ණ වගකීම පොලීසිය භාර ගනී.
එමෙන්ම, සත්‍ය නොවන හෝ තහවුරු නොකළ දෘශ්‍ය දත්ත පළ කරන මාධ්‍ය ආයතන සහ පුද්ගලයන්, අදාළ පාර්ශවයන් විසින් අධිකරණයේදී ප්‍රශ්න කිරීමට ලක්වූ විට වගකීම භාර ගත යුතු බවද පොලිසිය අවවාද කරයි.
කෙසේ වෙතත්, මෙම උපදෙස් මගින් පුරවැසියන්ට මෙරට ව්‍යවස්ථාවෙන් සහතික කළ මූලික අයිතීන්ට බාධාවක් සිදු නොවන බවද පොලිසිය ප්‍රකාශයේ දැක්වේ.
