ඡායාරූපය: සත්සර නිමේශ්ගේ මව කියන්නේ සිය පුතා, තමාට පොලිසිය පහර දෙන බව කතා කර කී බවයි.
ජාතික ජන බලවේග ආණ්ඩුවේ පොලිස් ඇමති ආනන්ද විජේපාල, ගෝඨාභය රාජපක්ෂගේ පොලිස් ඇමති සරත් වීරසේකර සහ රනිල් රාජපක්ෂගේ පොලිස් ඇමති ටිරන් අලස් ගේ වල්ලලේම ගෙඩියක් බව දිගින් දිගටම අනාවරණය වෙමින් තිබේ.
ශ්‍රී ලංකාව අසළ මුහුදේ සිටියදී ගොඩ බිමට ගෙන එන ලද රොහින්ගියා සරණාගතයින් මියන්මාරයේ හමුදා ජුන්ටාවට බාර දීමට ගොස් වැරදුණූ තැන ශ්‍රී ලංකාවට රොහින්ගියා සරණාගතයින් ලක්ෂයක් ඒමට සැළසුම් කර ඇතයි කෙබරයක් ඇද බෑවේ එම ජනයාට විරුද්ධවය.
තවම එම ලක්ෂයෙන් එක් අයකු හෝ මෙරටට පැමිණ නැත.
කොටහේනේදී අත්අඩංගුවට ගත් තරුණයන් දෙදෙනා ආයුධ පෙන්වීමේ පරණ පුරුදු පොලිස් සෙල්ලම මගින් ඝාතනය කිරීම ගැන ආන්නද විජේපාල කටක් ඇරියේ නැත. එම පොලිස් ඝාතකයින්ට විරුද්ධව කිසිදු පියවරක් ගත්තේ නැත.
අනුරාධපුර රෝහලෙහි වෛද්‍යවරියක් බලහත්කාරයෙන් ලිංගික කෙළසීම සම්බන්ධයෙන් සැකපිට අත්අඩංගුවට ගත් පුද්ගලයාට පොලිසිය දස වද දුන්නේය. ඔහුගේ ගුද මාර්ගයේ දිග පළලද මැන බලා ගැනීමට පොලු එගුවේය.
ඒ වධකයින්ටද විරුද්ධව කිසිදු පියවරක් ආනන්ද විජේපාලගේ පොලිසිය ගත්තේ නැත.
දැන් සත්සර නිමේෂ් ඝාතනය සම්බන්ධයෙන් පොලිසිය පරණ පුරුුදු බයිලාවම කිසිදු බයක් නැතිව ගායනා කරමින් සිටින්නේ ආන්නද විජේපාල ඊට සංගීතය සපයන බව දන්නා නිසාය.
මේ කතාව අමුලික බොරුවකි.
නීතියේ ආධිපත්‍ය පිහිටුවන බවට හිසේ අත් ගසා දස අතේ පොරොන්දු වු ජනාධිපති අනුර කුමාර දිසානායකගේ දකුණූ අත මේ ආනන්ද විජේපාලය.
එබැවින් මේ චෝදනාව එල්ල වන්නේ ආනන්ද විජේපාලට පමණක් නොවේ. අනුර කුමාර දිසානායකටත් සමඟය.
මෙම ඝාතනය සම්බන්ධයෙන් ක්‍රියාාකරී වැඩ කොටසක් ඉටු කරමින් සිටින සිරකරු අයිතින් රැකගැනිමේ සංවිධානයේ ප්‍රධානී නීතිඥ සේනක පෙරේරා මෙසේ සඳහන් කරයි.
“වැලිකඩ පොලිස් අත්අඩංගුවේ දී මිය ගිය සත්සර නිමේෂ් තරුණයාගේ මව වන ලේකම් වසම් ලියනගේ සමන්ති පොලිසියෙන් අසා සිටියේ “මගෙ පුතාට ඇයි මෙහෙම කලේ”කියලයි. තව අම්මලා කී දෙනෙකුට මේ ප්‍රස්නය අහන්න වෙයිද කියා අපි නොදනී. මේ නිසා නීතියේ විධානය පොලොවේ ක්‍රියාත්මක කරන්න නම් පොලිසිය පුනරුත්ථාපනය කිරීමේ කටයුත්ත වහා ඇරඹීය යුතු වේ. පොලිසියට පරණ බෙරයම ගහන්න දෙනවා නම් පුරවැසියාගේ ආරක්ෂාව හැමදා අනතුරේය. සිරකරු අයිතිවාසිකම් සුරැකීමේ කමිටුවේ (CPRP ) අපි ඒ නිසයි හැමදාම කිව්වේ පොලිස් අත්අඩංගුවට ගන්නා සැකකරුවන්ට කැලෑ නීති නැතුව පවතින නීතිය අනුව කටයුතු කරන්න කියලා .අනීතික කටයුතු කුඩුකාරය,පාතාල කාරය, LTTE කාරය ..කියලා සාධාරනීකරණය කරන්න බැරි බව දැනගත යුතුයි .”
පෙරටුගාමී සමාජවාදී පක්ෂයේ ප්‍රධානියකු වන පුබුදු ජාගොඩ මෙසේ ප්‍රකාශ කරයි.
වැලිකඩ පොලීසියේදී මියගිය (මරා දැමුණු?) සත්සර නිමේෂ් තරුණයා සම්බන්ධයෙන් පොලීසිය නිකුත් කර තිබෙන මෙම නිවේදනය අපට පවසන්නේ නිමේෂ්ගේ මරණය ගැන සත්‍යය නොව පොලීසිය සහ රාජ්‍යය ගැන සත්‍යයි.
“පොලීසිය කියන ආකාරයට මෙම තරුණයාට මානසික රෝගයක් තිබී ඇති අතර ඔහුගේ මළ සිරුරේ හිසට සිදුවී ඇති තුවාල ඔහු තමන් විසින්ම සිය හිස බිත්තියේ වද්දා ගැනීමේ ප්‍රතිඵලයකි. මේ සුරංගනා කතාව ආයුද පෙන්වීමට ගොස් පොලීසියට වෙඩි තැබීමේ පිටපත ගොංපාට් වීම නිසා පොලීසිය ලියන අලුත් පිටපත විය හැක.
“ප්‍රශ්නය වන්නේ මීට මසකට පමණ පෙර කොටහේනේදී අත්අඩංගුවට ගත් තරුණයන් දෙදෙනෙකු ආයුධ පෙන්වීමේ නාඩගමකින් ඝාතනය කළ අතර එම නිලධාරීන් සම්බන්ධයෙන් විනය ක්‍රියාමාර්ගයක් නැත. අධිකරණයක් තුළ සැකකරුවෙකු වෙඩි තබා මරා දැමුණු අතර එම ක්‍රියාවලියට පොලීසියේ හා බන්ධනාගාරයේ නිලධාරීන් වගකිව යුතු බව ඇස් පනාපිට පෙනෙද්දීත් තවමත් ඒ ගැන විමර්ශනයක් හෝ ක්‍රියාමාර්ගයක් නැත.
දැන් ලංකාවේ ඇත්තේ Impunity ( දණ්ඩ මුක්තිය) නම් ඉංග්‍රීසි වචනයෙන් හැඟවෙන ආකාරයේ වරදක් කර ගැලවිය හැකි බවට වන විශ්වාසයක් නිලධාරීන්ට හා දේශපාලඥයන්ට ගොඩනැගී තිබීමයි. නැවත මෙවැනි දේවල් සිදු නොවීමටනම් චූදිතයන් ගැන විමර්ශන පවත්වා දඬුවම් දිය යුතුය.
එය අත්අඩංගුවේදී වධ හිංසා කිරීමට හා මරා දැමීමට සම්බන්ධ සිදුවීම් වන 1989දී රෝහණ විජේවීර සහෝදරයා ඇතුළු ජවිපෙ නායකයන් මරා දැමීම. බටලන්ද ඇතුළු වධකාගාර. උතුරේ සිදුවූ අපරාධ ආදිය ගැන කඩිනම් ක්‍රියාමාර්ග වලින් ආරම්භ කළ යුතුය. ආණ්ඩුව වහාම එම වගකීම භාරගත යුතුය. ජනතාව ඒ සඳහා පීඩනයක් පීඩනයක් යොදන මහජන මතයක් හා මහජන බලයක් නිර්මාණය කිරීමට පෙලගැසිය යුතුය.