ඇයගේ පියා කේ.කේ.පීටර්ය. ඔහු ලංකා සම සමාජ පක්ෂයේ ක්‍රියාකාරිකයෙකි.
කේ.කේ.කරුණාවතී ගේ පවුලේ සොයුරු සොයුරියන් ගණන 6දෙනෙකි. කළු අක්කා ජනතා විමුක්ති පෙරමුණේ පූර්ණකාලීන ක්‍රියාකාරිණියක වූයේ 1978 වර්ෂයේදීය විජේවීර සහෝදරයා අත් අඩංගුවට ගන්නා විට කේ.කේ.කරුණවතී ද ඒ නිවසේ සිටියාය. විජේවීර සහෝදරයාගේ නිවසට ඇය පැමිණියේ ඊට වසර දෙකයි මාස තුනකට පෙරය. ඇය එහිදී හැඳින්වූයේ කළු අක්කා යනුවෙන්ය.
ඇය එම නිවසට කැන්දාගෙන ගොස් තිබුණේ කරුණාවතීගේ වැඩිමහල් සොහොයුරා වූ කුකුලේ කංකානම් ගේ සයිමන්ය. කේ.කේ සයිමන් වෙත ගමනායක කළ ඉල්ලීමකට අනුව කරුණාවතී නොහොත් කලු අක්කා විජේවීර සහෝදරයාගේ නිවසට ගියාය. කරුණාවතී විජේවීර සහෝදරයාගේ නිවසට කැන්දාගෙන ගියේද ගමනායකය. එහිදී මීගොඩ දක්වා ඇය කැටුව ඇයගේ සහෝදරයා වූ කේ.කේ සයිමන් ගිය අතර ඉන් අනතුරුව ඇය එහි රැඳී සිටි ගමනායකට බාර කෙරිණි.
මේ සිද්ධියෙන් තහවුරු කර ගත හැක්කේ කේ.කේ.සයිමන් හා ජවිපෙ නායකයන් අතර පැවතුන දැඩි සමීප සම්බන්ධතාවයි.
කේ.කේ.සයිමන් ජවිපෙ පූර්ණකාලිකයකු වූයේ 1976 වසරේ සිටය. එතැන් සිට ජවිපෙ ක්‍රියාකාරී දේශපාලනයේ නිරත වූ ඔහු 1986 සිට 1990 දක්වා දෙවැනි ජවිපෙ කැරැල්ලේ කළුතර දිස්ත්‍රික්කයේ ප්‍රබල නායකයෙක් විය. මේ කාලය තුළ ටිල්වින් සහෝදරයාද කළුතර දිස්ත්‍රික්යේ ජවිපෙ දේශපාලනයේ නිරත වූ බවට කිසිම සැකයක් නැත.
කේ.කේ සයිමන් අත් අඩංගුවට ගෙන වද දී මරා දමන ලද්දේ වැලිපැන්න පොලීසියේ සේවය කළ උප පොලිස් පරීක්ෂක ඩී.එල්.ආර් රණවීරය. අත් අඩංගුවේදී කෘෘර වද හිංසා වලට බඳුන් වුවද සයිමන් සහෝදරයා පක්ෂයේ ඉහළ පෙලේ නායකයන් පාවා නොදුන් බව සිතා ගත හැකිය. එහෙත් ඒ වන විටත් ඔහු විජේවීර සහෝදරයා සැඟව සිටි ස්ථානය දැන සිටි බව නම් සහතිකය.
තෙබුවන පොලීසියේ ස්ථානාධිපති පොලිස් පරීක්ෂක ගනේද්‍ර වාස් ගුණවර්ධන හා වැලිපැන්න පොලීසියේ උප පොලිස් පරීක්ෂක ඩී.එල්.ආර්. රණවීරත් ඒ දිනවල කළුතර දිස්ත්‍රික්කයේ වදකාගාර පවත්වා ගෙන ගිය ප්‍රසිද්ධ පොලිස් කාරයන් විය.
ගනේන්ද්‍ර වාස් ගුණවර්ධන වර්තමානයේදී ජීවිතාන්තය දක්වා සිර දඬුවම් විඳිමින් සිටී.ඒ මිනිස් ඝාතනයකට වරදකරු වීම නිසාය. ඔහු මේ චෝදනාවට ලක් වන්නේ ඡ්‍යෙෂ්ඨ නියෝජ්‍ය පොලිස්පති වරයකු ලෙස සේවයේ නිරතව සිටියදීය. උප පොලිස් පරීක්ෂක ඩී.එල්.ආර්.රණවීර ඡ්‍යෙෂ්ඨ පොලිස් අධිකාරීවරයකු ලෙස විශ්‍රාම ගොස් මේ වන විට ජාතික ජන බලවේගය ආණ්ඩුවේ මහජන ආරක්ෂක අමාත්‍යංශයේ උපදේශකයෙක් ලෙස පත් වී සිටී.මහජන ආරක්ෂක ඇමති ආනන්ද විජේපාල හා ඩී.එල්.ආර්.රණවීර පොලිස් සේවාවේ උප සේවාවට එක් වී ඇත්තේ එකම කණ්ඩායමක සාමාජිකයන් ලෙස බව පැවසේ. පැන්ෂන් ගිය රණවීර අමාත්‍යංශ උපදේශකයකු ලෙස ඇමතිවරයා විසින් පත් කර ගන්නා ලද්දේ පැරණි දැන හැඳුනම්කම නිසා වන්නට ඇත.කෙසේ වෙතත් මහජන ආරක්ෂක අමාත්‍යංශයේ උපදේශක විශ්‍රාමික ඡ්‍යෙෂ්ඨ පොලිස් අධිකාරීවරයා කටයුතු කරන්නේ එම අමාත්‍යංශයේ ලේකම් රවි සෙනෙවිරත්නටත් ඉහළින් බව අමාත්‍යංශයෙන් ලැබෙන ආරංචි මාර්ග වලින් දැන ගැන්මට තිබේ. පොලිස් සේවාව තුළ තවමත් “රාජපක්ෂ කුලී කාරයන්” ආධිපත්‍යය පතුරවමින් සිටින්නේ මේ උපදේශක රණවීරගේ හපන්කම හා මැදිහත් වීම නිසා බව බොහෝ දෙනා චෝදනා කෙරේ.මේ චෝදනා පිළිබඳව මහජන ආරක්ෂක අමාත්‍යංශයේ ඇමති ඩබල සිටින්නේ බිහිරන් ලෙසය.
මහජන ආරක්ෂක අමාත්‍යංශයේ උපදේශක ඩී.එල්.ආර්.රණවීරගේ පොලිස් සේවාව පිළිබඳව ආපසු හැරී අවුස්සා බැලුව හොත් එය කැත හා අවලස්සන කලු පැල්ලමක් බව සඳහන් කළ යුතුමය.
මොහුට එරෙහිව තාජුඩීන් ඝාතනයේ සාක්ෂි වසන් කිරීමේ චෝදනාවක් එල්ල වී තිබේ.2016 ජුනි මස 23 වන දින රහස් පොලීසිය කොළඹ අතිරේක මහේස්ත්‍රාත් වරයා වෙත කරුණු වාර්තා කරමින් කොළඹ අපරාධ කොට්ඨාශයේ අධ්‍යක්ෂ ඡ්‍යෙෂ්ඨ පොලිස් අධිකාරී ඩී.එල්.ආර්.රණවීර ගේ උපදෙස් මත තාජුඩීන් ගේ ජංගම දුරකථන ඇමතුම් වාර්තා වෙනත් නඩුවක අධිකරණ නියෝගයක් මත ලබාගෙන රාජ්‍ය බුද්ධි ප්‍රධානීට ලබා දී ඇතැයි පවසා තිබේ. තවදුරටත් කොළඹ අපරාධ කොට්ඨාශය මෙම අපරාධ සිද්ධිය පිළිබඳව කරුණු වසන් කර ඇති බවටද රහස් පොලීසිය අධිකරණයට දන්වා ඇත.
එපමනක්ද නොවේ මේ රණවීර උන්නැහේ රාජපක්ෂවරුන් වෙනුවෙන් සිය පොලිස් ආත්මය පාවා දී ඇති අවස්ථා ගණනාවකි.
ටිල්වින් සහෝදරයා පක්ෂය වෙනුවෙන් කෲර වද හිංසා විඳිමින් මිය ගිය සහෝදරවරුන් පිළිබඳව කම්පා වන විට ජවිපෙ න්‍යෂ්ඨිය කරගත් ජාතික ජන බලවේගය ආණ්ඩුවේ මහජන ආරක්ෂක අමාත්‍යංශයේ උපදේශකයා ලෙස පත් කර ගෙන සිටින්නේ ජවිපෙ සහෝදර වරුන් ඝාතනය කරන ලද වදකයෙකි. එම පත්වීම ලබා දීමේදී ටිල්වින් සහෝදරයාට හෝ අඩුම තරමේ තමන් සමග දේශපාලනයේ නිරත වූ කේ.කේ.සයිමන් සහෝදරයා සිහිපත් වූයේ නැද්ද යන්න බරපතල ප්‍රශ්ණයකි.එසේ නැතිනම් ඔහු පසුගියදා හැඟීම්බර වූයේ උප පොලිස් පරීක්ෂක ඩී.එල්.ආර්.රණවීර විසින් කෲර වද හිංසා කර මරා දමන ලද සයිමන් සහෝදරයා අත් හැර වන්නට පුළුවන.
ජාතික ජන බලවේගයේ මැතිවරණ පොරොන්දු අතර තාජුඩීන් ඝාතනයේ සැකකරුවන් අධිකරණය ඉදිරියට ගෙන එන බවට වූ පොරොන්දුවක්ද වේ.
එහෙත් තාජුඩීන් ඝාතනයේ සාක්ෂි වසන් කිරීම සම්බන්ධයෙන් චෝදනා ලැබූ පොලිස්කාරයා දැන් ජාජබ ආණ්ඩුවේ උපදේශකයකි. එය බරපතල පටලැවිල්ලකි. මේ උපදේශකයා මහජන ආරක්ෂක අමාත්යංශයට දෙන උපදෙස් තුළ තාජුඩීන් ඝාතන පරීක්ෂණ වලට ඉඩක් හිමි නොවන බව ඉතා පැහැදිලිය.
එසේම ජාතික ජන බලවේගය වැනි පරමාදර්ශී දේශපාලනයකට මෙවැනි විශ්‍රාමික පොලිස් කාරයකුගෙන් ලබා ගත හැකි උපදේශය කුමක්ද යන්න පවා පැහැදිලි නැත.එහෙත් අවාසනාවකට එය එසේ සිදුවෙමින් තිබේ.
මහජන ආරක්ෂක අමාත්‍යංශයේ ඇමති ආනන්ද විජේපාල ජවිපෙ පූර්ණ කාලිකයෙක් නොවේ. එහෙත් එම අමාත්‍යංශයේ නියෝජ්‍ය අමාත්‍ය සුනිල් වටගල ජවිපෙ ඉහල ඇවරියේ නායකයෙකි. සිය අමාත්‍යංශයේ උපදේශකයෙක් ලෙස පත් කරගෙන සිටින පැන්ෂන් පොලිස් කාරයා ගැන ඔහුටවත් හිරිකිතයක් ලැජ්ජාවක් නොදැනීම නම් හිතා ගන්නට බැරි තරමේය. ටිල්වින් සහෝදරයාගේ හැගීම්බර වීමත් සුනිල් වටගල නියෝජ්‍ය අමාත්‍යවරයාගේ ජවිපේ දේශපාලනයත් ජනතාව මුලා කරන ඇස්බැන්දුම් රඟපෑම්ද යන තරමට මේ ප්‍රශ්ණය ජාජබ සමීපතමයන් තුළ සාකච්ඡා වෙමින් පවතී.
