අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ජ්‍යෙෂ්ඨ පොලිස් අධිකාරී ශානි අබේසේකර මහතා ඝාතනය කිරීමේ කුමන්ත්‍රණයක් සම්බන්ධයෙන් බුද්ධි අංශ තොරතුරු අනාවරණය කරගෙන ඇති බව නීතිපතිවරයා අභියාචනාධිකරණයට ඊයේ දැනුම් දුන්නේය.
ජ්‍යෙෂ්ඨ පොලිස් අධිකාරී ශානි අබේසේකර රිය අනතුරකින් ඝාතනය කිරීමේ සැලසුම් කිරීම බුද්ධි අංශ විසින් අනාවරණය කර ගත් සැලැස්මට සම්බන්ධ බව අභියාචනාධිකරණයට දැනුම් දෙන ලදී.
ජ්‍යෙෂ්ඨ පොලිස් අධිකාරී ශානි අබේසේකර මහතා ගොනු කළ රිට් පෙත්සමක් විභාගයට ගත් අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් රොහන්ත අබේසූරිය මෙම තොරතුරු අධිකරණයට දැනුම් දුන්නේය.
අබේසේකර මහතාගේ ජීවිත තර්ජනවලට ප්‍රතිචාර වශයෙන් අවශ්‍ය පියවර ගන්නා ලෙසත් ඔහුට ප්‍රමාණවත් ආරක්ෂාවක් සපයන ලෙසත් පොලිස්පතිවරයාට සහ අනෙකුත් වගඋත්තරකරුවන්ට නියෝගයක් නිකුත් කරන ලෙස පෙත්සම මගින් විශේෂයෙන් ඉල්ලා සිටී.
ශානි අබේසේකරට එල්ල වී ඇති තර්ජනවල ස්වභාවය විස්තර කෙරෙන වාර්තාවක් ලබාදෙන ලෙස වින්දිතයන් සහ සාක්ෂිකරුවන් සුරැකීමේ අධිකාරියට අධිකරණය මීට පෙර නියෝගයක් නිකුත් කර තිබුණි.
පෙත්සම්කාර ශානි අබේසේකර මහතා වෙනුවෙන් පෙනී සිටි ජනාධිපති නීතීඥ උපුල් ජයසූරිය මහතා අධිකරණයට දන්වා සිටියේ තම සේවාදායකයාට ලබාදී ඇති ආරක්ෂක විධිවිධානවලින් සෑහීමට පත් නොවන බවයි.
තම සේවාදායකයාගේ ආරක්ෂාව සඳහා ලබාදී ඇත්තේ පැරණි යතුරුපැදියක් සහ පොලිස් නිලධාරීන් තිදෙනෙකු පමණක් බව ඔහු අධිකරණයේ අවධානයට යොමු කළේය. තවද, පෙත්සම්කරුට ප්‍රමාණවත් ආරක්ෂාවක් ලබා දෙන ලෙස වින්දිතයන් සහ සාක්ෂිකරුවන් ආරක්ෂා කිරීමේ අධිකාරිය විසින් පොලිස්පතිවරයාට නියෝග කළද එය මෙතෙක් ක්‍රියාත්මක වී නොමැති බවට ඔහු චෝදනා කළේය.
අනතුරුව මෙම පෙත්සමට අදාළ නියෝගය දෙසැම්බර් 14 වැනිදා නිකුත් කිරීමට අභියාචනාධිකරණය තීරණය කළේය.
ඩේලි එෆ් ටී පුවතක් ඇසුරිණි.