ඡායාරූපය: පොලිස්පතිවරයා විසින් නම්කළ ඊනියා ස්වාධීන පරීක්ෂණ කමිටුවේ නිලධාරියෙකු නියෝජ්‍ය පොලිස්පති අජිත් රෝහණ මැදිහත්වී පොලීසිය විසින් අධිකරණයට භාරදුන් වාර්තාවේ 298 වගන්තියට අදාල කොටස tipex කර ඇති බව පුබුදු ජාගොඩ පවසයි.
කෑගල්ල ප්‍රදේශයේ 2022.04.19. දින සිදු වූ උද්ඝෝෂණයක් අතරතුරදී තරුණයෙකු මියයාම, පිරිසක් තුවාල ලැබීම හා දේපලට අලාභහානි කිරීම සම්බන්ධයෙන් පොලිසිය ඊයේ දින (20) බී වාර්තා දෙකක් මගින් කෑගල්ල මහේස්ත්‍රාත් වාසනා නවරත්න මහත්මිය වෙත කරුණු වාර්තා කරන ලදී.
ඉන් එක් බී වාර්තාවක් මගින් දේපල හානි කිරීමට අදාලව සැකපිට වයස අවුරුදු දහ අටක පාසල් ශිෂ්‍යයෙක් ඉදිරිපත් කර පොදු දේපල පනත ඇතුලුව චෝදනා කීපයක් යටතේ කරුණු වාර්තා කර තිබුණි.
ඔහු වෙනුවෙන් ජ්‍යෙෂ්ඨ නීතිඥ චමින්ද අතුකෝරාල මහතා ඉදිරිපත් වෙමින් එම තරුණයාට ඇප ලබාගැනීමට කටයුතු කළේය.
අදාල ගැටුම සම්බන්ධව සියලු ස්ථාන පරීක්ෂණ මහේස්ත්‍රාත්වරිය විසින් සිදුකළ අතර මීට පොලිස් නිළධාරින් හා සීයයකට අධික නීතීඥවරුන් සහභාගි විය.
ස්ථාන පරීක්ෂණය රාත්‍රී හත පමණ වන තෙක් පැවැත්වූ අතර සිද්ධි මාලාවේ විවිධ අවස්ථා ඇසින් දුටුවන් කිහිප දෙනෙක් ස්ථාන පරීක්ෂණයේදී මහේස්ත්‍රාත්වරිය වෙත ස්වෙච්ඡාවෙන් ඉදිරිපත් වී ප්‍රකාශ ලබා දී තිබුි.
මෙහිදී අදාළ ගැටුම සිදු වූ ස්ථානයන්හි සීසීටීවී කැමරාවන්ට අලාභහානි සිදුවී තිබූ බව මහේස්ත්‍රාත්වරියගේ නිරීක්ෂණයට ලක්ව තිබුිණි.
ස්ථාන පරීක්ෂණය සදහා ඉල්ලීමක් කරමින් ගරු අධිකරණය වෙත ඉදිරිපත් කරන ලද බී වාර්තාවේ තිබූ දණ්ඩ නීති සංග්‍රහයේ 298 වගන්තිය යටතේ වූ වරදක් කරන ලදැයි වූ චෝදනාව ( නොසැළකිලිමත් ලෙස සාවද්‍ය මනුශ්‍ය ඝාතනයක් සිදු කිරීමේ වරද- උපරිම දණ්ඩනය වසර පහක බරපතල වැඩ සහිත සිර දඩුවමකි) මහේස්ත්‍රාත්වරිය ස්ථාන පරීක්ෂණයේ යෙදී සිටිමින් සිටින අතරවාරයේ පොලිසිය විසින් ටිපෙක්ස් කර මකා දමා ඇති ආකාරය අධිකරණයේදී නීතිඥයින් විසින් පෙන්වා දෙන ලදී.
මේ සම්බන්ධයෙන් සටහනක් තබව පුබුදු ජාගොඩ මෙසේ කියා තිබුණි.
අධිකරණයට පොලීසිය මුලින් ඉදිරිපත් කළේ AR වාර්තාවක්. ඒ කියන්නේ සිදුවීමක් සිදු වෙලා, සැකකරුවන් නැති අවස්ථාවක දාන වාර්තාවක්. මෙතන මිනීමැරුමක් සිදුවී තිබෙන නිසා මහේස්ත්‍රාත්වරිය AR වාර්තාවක් භාර ගැනීම ප්‍රතික්ෂේප කළා. ඉන් පසුව පොලීසිය කඩිනමින් B වාර්තාවක් සකස් කර අධිකරණයට ඉදිරිපත් කළා. එහි අපරාධ නඩු විධාන සංග්‍රහයේ 298 වගන්තිය ගැන සඳහන්ව තිබුණා. ඒ වගන්තිය අදාල වෙන්නේ සාවද්‍ය මනුෂ්‍ය ඝාතනයට. ඒ කියන්නේ පොලීසියම පවා මෙතන අනියම් මිනීමැරුමක් වූ බව පිලි ගන්නවා. ඒ අතර පොලිස්පතිවරයා විසින් නම්කළ ඊනියා ස්වාධීන පරීක්ෂණ කමිටුවේ නිලධාරියෙකු නියෝජ්‍ය පොලිස්පති අජිත් රෝහණ සමග අධිකරණයට පැමිණ සිටියා. ඔහු මැදිහත්වී පොලීසිය විසින් අධිකරණයට භාරදුන් වාර්තාවේ 298 වගන්තියට අදාල කොටස tipex කරලා. පසුව මේ ගැන නීතීඥයන් අධිකරණයට දැනුම් දුන්නා. එම නිලධාරියාට දැඩිව අවවාද කළ මහේස්ත්‍රාත්වරිය අධිකරණ ලේඛන මකා දමමින්, විකෘති කරමින් අධිකරණයට අපහාස කිරීම ගැන පරීක්ෂණයක් පවත්වන ලෙස පොලිස්පතිවරයාට දැනුම් දුන්නා. ඔන්න ඔහොමයි අද උසාවියේදී පොලීසිය ඇදගෙන නෑවේ. ඔන්න ඔහොමයි පොලීසිය පත් කරන ස්වාධීන පරීක්ෂණ කමිටු වල ස්වාධීනත්වය. අද රාත්‍රී පොලිස් මාධ්‍ය ප්‍රකාශක කාර්‍යාලය නිකුත් කළ නිවේදනයෙන් හෙලුව වහ ගන්න උත්සාහ කළත් එය අන්තිම අසාර්ථකයි. සත්‍යය හෙලිදරව් කිරීම වෙනුවෙන් ස්වේච්ඡාවෙන් ශ්‍රමය වැගිරූ සිය ගණනක් වූ නීතීඥ කණ්ඩායමට අපේ ආදරය! – පුබුදු ජාගොඩ, පෙරටුගාමී සමාජවාදී පක්ෂය
එහිදී අගතියට පත් පාර්ශවය වෙනුවෙන් පෙනී සිටි නීතිඥ මණ්ඩලයේ දැඩි අප්‍රසාදය හා විරෝධය පොලිසියේ එම ක්‍රියාව සම්බන්ධයෙන් එල්ල විය.
අධිකරණය භාරයේ තිබූ එම බී වාර්තාව අධිකරණයේ අවසරයකින් තොරව වෙනස් කිරීම සම්බන්ධයෙන් පොලිසිය අධිකරණයෙන් සමාව අයැද සිටින ලද අතර ඒ සම්බන්ධයෙන් පොලිස්පතිවරයාට වාර්තා කර අවශ්‍ය විනය ක්‍රියා මාර්ග ගන්නා බවට පොරොන්දු විය.
එසේම මෙහිදී නීතීඥවරුන් කරුණු දක්වා සිටියේ මුලින් අධිකරණයට ඉදිරිපත් කරන ලද බී වාර්තාවක් වෙනස් කිරිමට අවශ්‍ය නම් එය කල හැක්කේ වැඩිදුර තොරතුරු වාර්තාවක් ඉදිරිපත් කිරීමෙන් පමණක් බවත් එය අපරාධ නඩුවක මූලික සිද්ධාන්තය බවත් ය.
එසේම මෙම මූලික සිද්ධාන්ත හෝ නොදන්නා පොලිස් නිළධාරීන් මෙතරම් බරපතල සිද්ධියක් සම්බන්ධයෙන් අපක්ෂපාතී පරීක්ෂණයක් කරන්නේදැයි යන්න තමන්ට සැක සහිත බව ප්‍රකාශ කරමින් දැනට පරීක්ෂණ පවත්වන පොලිස් කණ්ඩායමෙන් මෙම පරීක්ෂණ ඉවත් කොට වෙනත් පොලිස් කණ්ඩායමක් වෙත මෙම පරීක්ෂණ සිදුකිරීමට නියෝග කරන ලෙස නීතීඥවරු අධිකරණයෙන් ඉල්ලා සිටියහ.
එසේම අදාළ සිද්ධිය සම්බන්ධයෙන් දැනටමත් පුද්ගලික රූපවාහිනී නාලිකාවක් තම ප්‍රවෘත්ති මගින් ප්‍රචාරය වන ලද වීඩියෝ පට වල සංස්කරණය නොකරන ලද දර්ශන එම ආයතනය භාරයේ සුරක්ෂිතව තබා ගැනීමට නියෝගයක් හා එකී වීඩියෝ පට එම ජනමාධ්‍ය ආයතනය වෙත ඉදිරිපත් කරන ලද පුද්ගලයින්ගේ නම් ලැයිස්තුවක් අධිකරණය වෙත ඉදිරිපත් කිරීමේ නියෝගයක්ද නීතිඥවරු ඉල්ලා සිටියහ.
තවද නීතීඥවරු අධිකරණයෙන් ඉල්ලා සිටියේ දැනටමත් අදාල සිද්ධියේදී පොලිසිය අවම බලය පාවිච්චි කර ඇති බව පිලිගෙන ඇති නිසා වෙඩි තැබීමේ නියෝගය නිකුත් කල පොලිස් නිළධාරියා හා වෙඩි තැබීම කල පොලිස් නිළධාරින් මරණකරු සම්බන්ධයෙන් වූ මරණ පරීක්ෂණයේ සාක්ෂිකරුවන් ලෙස ඇතුලත් කරන ලෙසයි.
අගතියට පත් පාර්ශවය වෙනුවෙන් ශ්‍රී ලංකා නීතිඥ සංගමය නියෝජනය කරමින් ජනාධිපති නීතිඥවරුන් වන රියන්සි අර්සකුලරත්න, සරත් ජයමාන්න, උපුල් ජයසූරිය, උපාලි මොහොට්ටි හා ජ්‍යෙෂ්ඨ නීතීඥ චමින්ද අතුකෝරාල මහත්වරුන් සමග තවත් නීතිඥවරුන් සීයයකට ආසන්න සංඛ්‍යාවක් කිසිදු ගාස්තු අයකිරීමකින් තොරව පෙනී අධිකරණය ඉදිරියේ පෙනී සිටියහ.
ප්‍රදේශයේ පොලිස් ඇදිරි නීතිය පනවා දැඩි ආරක්ෂාවක් යොදවා තිබුණු අතර අධිකරණ කරයුතු රාත්‍රී 11.00 පමණ වන තෙක් පැවැත්විිණ
අදාල සිද්ධිය සම්බන්ධයෙන් වූ සාක්ෂිකරුවන්ගේ සාක්ෂි අද (21) දින කෑගල්ල ග මහේස්ත්‍රාත් අධිකරණය ඉදිරියේ ගැනීමට නියමිත අතර මෙකී සිද්ධිය සම්බන්ධව දන්නා යම් පුද්ගලයෙකු වේ නම් අද දින කෑගල්ල මහෙස්ත්‍රාත් අධිකරණය වෙත ඉදිරිපත් වී නීතිඥවරුන් මාර්ගයෙන් කරුණු දක්වා සාක්ෂි ලබාදීමේ අවස්ථාව ලබා කර ගත හැක.
අද දිනයේදී වැඩිදුර මරණ පරීක්ෂණ සාක්ෂි සටහන් කරගැනීම හා පෙර දිනයේ ඉල්ලීම් වලට අදාල නියෝග නිකුත් කිරීමට නියමිතයි.