බාල වයස්කාර පිරිමි දරුවන්ව ලිංගික අපයෝජන සඳහා යොදාගෙන එකී අපයෝජන අවස්ථා ඇතුළත් වීඩියෝ දර්ශන විදේශ රටවලට විකිණීමේ ජාවාරමක නිරත වූ බව කියන සිද්ධියක් සම්බන්ධයෙන් කොල්ලුපිටිය පොලිසිය මඟින් අත්ඩංගුවට ගත් පන්නිපිටියේ දෙපානම රියැලිටි වැඩසටහන් නිර්මාණකරුවෙකු වූ නිරන්ත එදිරිසිංහ ගේ සහායක මෙන්ම ඔහුව මෙහෙයවන ලද උපුල් හේවා නම් ඕස්ට්‍රේලියාවේ ජීවත් වන වෛද්‍යවරයා කිසිදු චෝදනා ගොනු කිරීමකින් තොරව නිදහස් වී තිබේ.
පසුව දේශපාලන බලපෑම් මත නිරන්ත එදිරිසිංහ විසින් උපුල් හේවා පිලිබඳව හෙළි කරන ලද කට උත්තරය වෙනස් කොට තිබේ. තවද මෙම ළමා අපයෝජන පිලිබඳ මූලික පරීක්‍ෂණ පවත් වන ලද වරුණී බෝගහවත්ත මහත්මියද මාරු කරන ලදි.
උපුල් හේවා සම්බන්ධයෙන් ඕස්ට්‍රේලියානු වෛද්‍ය සභාව සහ ඕස්ට්‍රේලියානු ළමා කාම අපරාධ බියුරෝව පරීක්‍ෂණ ආරම්භ කරන ලද අතර ශ්‍රී ලංකාවේ විමර්ශකයන් ඕස්ට්‍රේලියානු බලධාරීන්ට උපුල් හේවා ගේ ළමා අපයෝජන වාර්තා ලබා නොදීම නිසා එම විමර්ශන අතරමඟ නැවතී තිබේ. ශ්‍රී ලංකාව කේන්ද්‍ර කොට ගෙන අන්තර්ජාතිකව මහා පරිමාණයෙන් පවත්වාගෙන ගිය ළමා කාම වීඩියෝ ජාවාරම පිලිබඳ විමර්ශණ කටයුතු වලදී ශ්‍රී ලංකා පොලිසිය විසින් ඕස්ට්‍රේලියානු බලධාරීන්ට ප්‍රමාණවත් සහායක් ලබා දී නොමැත. මේ නිසා වෛද්‍ය උපුල් හේවාට විරුද්ධව පියවර ගැනීමට ඕස්ට්‍රේලියානු බලධාරීන් අපොහොසත් වී තිබේ. මේ වන විට දොස්තර උපුල් හේවා ඕස්ට්‍රේලියානු බලධාරීන් ගේ පූර්ණ ආවේක්‍ෂණයක් යටතේ සිටින අතර ළමුන් සම්බන්ධ ක්‍රියාකාරකම් වලට සහභාගි වීම සඳහා ඔහුට සීමා පනවා තිබේ. එහෙත් ඉන්ටපෝල් ආයතනය උපුල් හේවා පිලිබඳ දත්ත ඔවුන් ගේ වාර්තා වලට ඇතුල් කරගෙන ඇත.
නිරන්ත එදිරිසිංහ ගේ හවුල්කරු වූ උපුල් හේවා වෛද්‍යවරයෙකු ලෙස ලංකාවේ රෝහල් කීපයක සේවය කොට ඇති අතර සෑම රෝහලකදීම ඔහු විසින් විවිධ නම් භාවිතා කොට තිබේ. එක් රෝහලකදී ඔහු කුමාර ජයසිංහ වූ අතර තවත් රෝහලකදී උපුල් ජයසිංහ ලෙසට තමන්ව හඳුන්වාගෙන තිබේ. ඕස්ට්‍රේලියාවට යාමට පෙර උපුල් හේවා මහනුවර ශික්‍ෂණ රෝහලේ නිර්වින්දන වෛද්‍යවරයෙකු ලෙස සේවය කරන ලද අතර ඔහු විසින් නව හැවිරිදි පිරිමි ළමයෙකු ලිංගික අපයෝජනයට ලක් කොට තිබේ. මෙම සිදුවීම ශල්‍ය වෛද්‍ය විශේසඥ පරාක්‍රම වෙල්ගම සහ ඔහුගේ බිරිඳ වූ විශේසඥ ළමා වෛද්‍ය හේමා වෙල්ගම මැදිහත්වී පොලිස් මැදිහත්වීමකින් තොරව සමථයකට පත් කොට ඇත. එම සිදුවීමෙන් පසුව ඔහු මහනුවර ශික්‍ෂණ රෝහලේ සේවය අතහැර ඕස්ට්‍රේලියාවට යන ලදි.
මෙම වෛද්‍යවරයා විසින් මේ වන විට විශාල වශයෙන් මුදල් වියදම් කරමින් තමන්ට එරෙහිව තිබෙන සාක්‍ෂි විනාශ කරමින් සිටින බවට තොරතුරු ලැබී තිබේ. තවද ඔහුට බලවත් දේශපාලකයෙකුගේ සහාය ලැබී ඇත. බ්‍රයන් ජෝන් සැඩික් නම් ඕස්ට්‍රේලියානු ජාතිකයකුට අයිති සමාගමක කොටස් රුපියල් මිලියන ගණනක වංචාවක් කිරීම සම්බන්ධයෙන් මෙම දේශපාලකයා අත් අඩංගුවට පත් වූ විටදී වෛද්‍ය උපුල් හේවා අදාල දේශපාලකයාට මුදලින් උපකාර කිරීම නිසා ඊට හිලව්වක් ලෙස එම දේශපාලකයා අපයෝජකයන් දෙදෙනා විශේෂයෙන් වෛද්‍ය උපුල් හේවා ගලවා ගැනීමට ක්‍රියා කල බවට වාර්තා වෙයි.