‘ව්‍යවස්ථාපිත ඒකාධිපතිත්වයට එරෙහි වෙමු’ තේමාවෙන් මාස දෙක තුනකට පෙර ජාජබ ආණ්ඩුවට එරෙහි දේශපාලන එකතුවත් කැඳවූහ. එහි හරි මැද සිටියේ මෛත්‍රීපාල සිරිිසේනය. ව්‍යවස්ථාපිත ඒකාධිපතිත්වය ගැන කතා කිරීමට විපක්ෂ පක්ෂවලට ඊට වඩා වැඩ්ඩෙකු සොයා ගැනීමට බැරි වීම සාධාරණය.
ව්‍යාවස්ථා කුමංත්‍රණයක් කල සිරිසේන ව්‍යවස්ථාව රැකගැනීමට පෙරමුණේ!
සිරිසේන වනාහි ව්‍යවස්ථා කුමන්ත්‍රණයක් කරන්නට ගොස් හොට බිම ඇණ ගත් දේශපාලනඥයා නිසාය. 2018 ඔහුගේ ඔක්තෝබර් ව්‍යවස්ථා කුමන්ත්‍රණය ශ්‍රේෂ්ඨාධිකරණය විසින් වල පල්ලට යවන තුරු ඔහු දන්නා තුරුම්පු සියල්ල දැම්මේය. එම ව්‍යවස්ථා කුමන්ත්‍රණයෙන් බැට කෑ එජාපයේ දෙබෑයම එම පුවත්පත් සාකච්ඡාවේ සිටියේ හිරිකිතයක් නැතිවය.
දැන් පෙනෙන විදියට ඒ සන්ධානය නැත. ඒ වෙනුවට ‘වංචනික මාලිමා ආණ්ඩුවේ මුග්ධ පාලනයට එරෙහි මහා ජනහඬ’ යැයි හවුලක් සෑදී තිබේ. එය පසුදා පුවත්පත් සාකච්ජාවක් පැවැත්වීය. එහි සජබ නැත. එය සජබට හොඳය.
වංචනික පාලනයට එරෙහිව ලක්ෂ 35ක් කප්පම් ගත් විදින ප්‍රසන්න රණතුංගත්
මේ ‘වංචනික පාලනය’ට එරෙහි මහා හඩ නැගීමට අධිකරණය හමුවෙහි දශ ලක්ෂ ගණනාවක කප්පම් ගත් බව පිළිගෙන දඩුවම් හිමි වූ ප්‍රසන්න රණතුංග ද සිටීම සංකේතාත්මකය. මන්ද යත් මේ මහා ජන හඬ නැගීමට එක් වූ බොහෝ දෙනෙකු දැනටමත් වංචා දූෂණ සම්බන්ධයෙන් අධිකරණය හමුවෙහි චෝදනා ලබා සිටින්නන් වීම නිසාය. ‘රත්තරන්’ තුවක්කුවේ අයිතිකාරයාද එහි සිටී. වජිර අබේවර්ධනත් සිටියා නම් දූෂණ විරෝධී ක්‍රියාවලිය අඩපණ කරන්නේ කෙසේදැයි අසා දැන ගන්නට තිබුණි. සහනාධාර ගසා කෑ බවට චෝදනා එල්ල වී ඇති අනුර ප්‍රදර්ශන යාපා එහි සිටින්නේ මහත් සතුටිනි.
වීසා මගඩියේ ටිරන් අලස් ඉදිරියෙන්ම
අලි මදිවාට හරක් කීවා සේ වීසා මඟඩියේ මහ මොළකරු වූ ටිරන් අලස් ද ඉදිරියෙන්ම වාඩි වී සිටියේය. ඔහු දියත් කළ විසා මගඩියට උර දුන් ආගමන විගමන පාලකවරයා හිර ගෙදරය. එම මගඩිය යටතේ පත් කළ සමාගම් තුනක් මෙරටට අය විය යුතුව තිබූ රුපියල් මිලියන තුන්සිය හතළිහක් හොරකම් කළේය. නොමිලයේ වීසා සැපයිය යුතු වූ රටවලින් පැමිණි සංචාරකයින්ගෙන් ඩොලර් 18.5 බැගින් අය කර තවත් රුපියල් මිලියන 380ක් හොරකම් කළේය. මෙම මුදල් ශ්‍රී ලංකික බැංකු මඟ හැර කෙලින්ම විදෙස් බැංකු වලට යවන ලදී. ‘වංචනික’ ආණ්ඩුවකට එරෙහිව හඬ නැගීමට ටිරන් අලස් තරම් හොඳ වෙනත් මහත්මයෙක් වෙන කොහෙන් සොයා ගන්නද?
ජාතිවාදය අවුස්සන ගම්මන්පිළ සමඟ තලතාගේ ඉඟීබිඟි
සියල්ලට වඩා උත්ප්‍රාසය වන්නේ ජාතිවාදී මඩ ගොහොරුව ඇවිස්සීම සිය දේශපාලනය කර ගත් ගම්මන්පිල සමඟ රනිල්ගේ ලේකම් තලතා අතුකෝරල ඉඟිබිඟි පාමින් සිටීමයි. රනිල් වික්‍රමසිංහගේ උග්‍රතම මතාවාදී සතුරන් වූ විමල් වීරවංශ සහ ගම්මන්පිල දැන් මේ හවුලේ ලොකු පොරවල්ය. නොවැම්බර් මාසයේ 21දා පැවැත්වෙන බව කියන මහා හඬ රැළියෙහි ජාතිවාදය සහ ආගම් වාදය නොතිබුණහොත් පුදුමය. ජාතිවාදය සහ ආගම් වාදය ඇවිස්සීම පිණිස කැළනි නයා නිර්මාණය කළ දිලිත් ජයවීරගේ පක්ෂය ද හවුලේ මහා හඩකි.
රනිල්ගේ යුක්ති කොමිසමට විරුද්ධ විමල් වීරවංසත් හවුලට
රනිල් රාජපක්ෂ සිය පිං ජනාධිපති සමයෙහි යුද්ධ කාලීන මානව හිමිකම් කෙලසීම් ආමන්ත්‍රණය කිරීම පිණිස සත්‍ය සෙවීමේ සහ යුක්තිය සඳහා කොමිසම’ක් පිහිටුවීම පිණිස විශේෂ වැඩපිළිවෙළක් දියත් කළේය.
ඔහුගේ නව සන්ධානයේ සගයෙක් වන විමල් වීරවංශ සත්‍ය සෙවීමේ කොමිසමකට මාරාන්තික විරෝධයක් දක්වයි. ගම්මන්පිල ද සත්‍ය සෙවීමේ කොමිසමකට විරුද්ධය. නාමල් රාජපක්ෂද ඊට විරුද්ධය.
මහබැංකු අධිපති තක්කඩියෙක් කියන විමල්
රනිල් රාජපක්ෂ ජ්‍යාතන්තර මූල්‍ය අරමුදල හිස මුදුනින් පිළිගනී. විමල් වීරවංශට එය නයාට අඳු කොළ වැන්න. රනිල් රාජපක්ෂ විසින් වර්ණනා කරන ලද මහ බැංකු අධිපතිට විමල් වීරවංස ප්‍රසිද්ධීයේ තක්ඩියා කියා බැන වදී.
කිසිදු මුස්ලිම් හෝ දෙමළ ජාතික පක්ෂයක් මේ හවුලේ නැත. එම පක්ෂවල වැඩි බර ඇත්තේ සජබ දෙසටය. කදුරට වතුකර ප්‍රජාවගේ දෛනික වැටුප 1700 දක්වා ඉහළ නැංවීමට වතුහිමියන් එකඟ කරවා ගැනීමට අනුර කුමාර සමත් වූවහොත් කදුරට දේශපාලන සමීකරණය වෙනස් විය හැකිය. එය දුෂ්කර පිම්මකි. 200 වසරක් එම ජනයා අන්ත දුංඛිත වහල් බාවයේ තබා ගත් වතු හිමි පංතිය ඔවුන් ඉන් නිදහස් කිරීමට කැමති නැත. එම පොරොන්දුව ඉටු කිරීමට නොහැකි වුවහොත් එම ප්‍රජාව අතර ජාජබ ඩවුන්ද පල්ලම් වනවා ඇත.
ලක්ෂ 600 රන් ජාවරම්කරු හිස්බුල්ලාත් හවුලට ගැලපේ
මුස්ලිම් නියෝජනය සඳහා මෙම මහා හඬ හවුලට කැඳවා ගත හැකි දේශපාලනඥයා නම් සිරිසේන විසින් නැගෙනහිර ආණ්ඩුකාරවරයා ලෙස පත් කළ මහමුද් හිස්බුල්ලාය. ගිනී රටෙන් රුපියල් මිලියන 600ක රත්රන් ගැනීමට ගොස් දැන ඔහු ඉන්නේ එරට අධිකරණය හමුවේය. හිස්බුල්ලාට රුපියල් මිලියන 600ක් ලැබුණේ කෙසේද යන්න මේ හවුලට ප්‍රශ්නයක් නොවනු ඇත. මන්ද යත් හොරකම වැඩි වන තරමට ලංසුව ඉහළ යන නිසාය. සිරිසේන පාස්කු වන්දිය ලෙස මිලියන සියයක් ගෙවූයේ කෙසේ ද කියා අප දන්නේ ද නැත.
එය දූෂිතයින්ගේ දුෂ්ට වර්ගවාදී සන්ධානයකි. සිරිසේනගේ සිට නාමල් රාජපක්ෂ හරහා වික්‍රමසිංහ දක්වා එහි පිරී සිටින්නේ දූෂිතයින් සහ වංචනිකයින්ය. ඔවුන් සිහින දකින්නේ ජාතික ජන බලවේග ආණ්ඩුවේ දුර්වලතා ප්‍රයෝජනයට ගෙන තමන්ට බලයට පැමිණ පරණ සෙල්ලම් යළි පටන් ගත හැකි බවටය.
ලබන වසර මුලදී පැවැත්වීමට ඉඩ තිබෙන පලාත් සභා මැතිවරණයෙහි දී මෙම නයි මුගටි සන්ධානය පළමු අභියෝගයට මුහුණ දෙනු ඇත.
නායකයා රනිල්. එතකොට කුමාරයා කව්ද?
හවුලේ නායකත්වය යා යුත්තේ රනිල් වික්‍රමසිංහට බව රනිල්ගේ සභාපති සහ වංචාවට කුප්‍රසිද්ධ වජිර අබේවර්ධන කියයි. ඔටුන්න හිමි රාජපක්ෂ කුමාරයා එයට කුමන ප්‍රතිචාරයක් දක්වනු ඇත්ද යන්න රහසක් නොවේ. පාර්ලිමේන්තුවෙහි රනිල්ට/එජාපයට ඇත්තේ ආසන එකකි. නාමල්/පොදු ජන පෙරමුණට තුනකි. සජිත්/ සජබට 40කි.
ඕනෑම තර්කයක් අනුව විපක්ෂ හවුලක නායකත්වය හිමි විය යුත්තේ සජබටය. සජිත්ටය. නාමල් රාජපක්ෂ, රනිල්ට රාජපක්ෂට නායකත්වය දීමට සුදානම් නැත. රනිල්ට නායකයා විය හැක්කේ වජිර අබේවර්ධනට පමණය.
මෙම හවුලට ඒකාබද්ධ විකල්පයක් විය නොහැකි බව බැලූ බැල්මට පෙනේ. මාධ්‍ය වාර්තා කරන අන්දමට රනිල් රාජපක්ෂට නායකත්වය දීමට සැරසෙන වජිර අබේවර්ධනට බියෙන් නාමල් රාජපක්ෂ පොහොට්ටුව රැගෙන වේදිකාවෙන් බස යෑමට ඉඩ ඇත.
නයි මුගටි ඉලක්කය දූෂණ විරෝධය පිලී පැන්නවීම
නයි මුගටි සන්ධානයේ මහා පොදු සාධකය වන්නේ දූෂණ වංචා සෙවීමේ ජාජබ ආණ්ඩුවේ මෙහෙයුම පීලි පැන්නවීමයි. එහෙත් එය පමණක්ම සන්ධානයක් පවත්වා ගෙන යෑමට අප්‍රමාණවත්ය. මන්දයත් මැතිවරණ ජය ගැනීම අවසාන ඉලක්කය වන දේශපාලන පක්ෂ අතර ගැටුම ඇති වන්නේ ආසන සහ දිස්ත්‍රික් නායකත්වය වැනි ප්‍රශ්න අරබයා නිසාය.
නයි මුගටි සන්ධානය තාවකාලික සුරතාන්තයකින් එපිටට ගෙන යෑමට තරම් ජව සම්පන්න දේශපාලනයක් එයට නැත. ඇත්තෙන්ම නම් ජාජබ ආණ්ඩුවට විරුද්ධ වීම හැර කිසිදු සාමුහික වැඩ පිළිවෙළකට එකඟ වීමට එයට ඇති අවකාශය ඉතා පටුය. එහි මරණය කෙටී ඇත්තේ එහිය.
ජාජබ කුරියා ගහනවා
එසේ නමුත් ජාජබ ආණ්ඩුව තවමත් උඩු හුළඟ ඇල්ලූ සරුංගලයක් නොවේ. එය අනපේක්ෂිත අවස්ථාවල කූරියා ගසමින් පොළොව සිප ගැනීමට සැරසෙයි. කූරියා ගැසීම නවත්වා ගත හැක්කේ පළ පුරුදු සරුංගල් යවන්නෙකුට පමණි. සරුංගලයේ නූල දෙඅතින් රෙදි මනින්නකු මෙන් පට කිහිපයක් ගෙන නූල එකවර අතහැරිය යුතුය. එය කලාවකි. ජාජබ සරුංගලය කූරියා ගැසීම නැවැත්වීමේ හැකියාව පෙන්වා ඇත්තේ දෙතුන් දෙනෙකු පමණි. ජනාධිපති දිසානායක නැතිනම් එය කොතරම් ඉහළ අහසේ තිබුණද කූරියා ගසා වල කජ්ජ කරා යෑමට ඉඩ නැතුවා ද නොවේ.
පොලිස් කෝලම නම් ජවුසම
ඔහු ඉක්මනින් නවත්වා ගත යුතු කෝලමක් ද තිබේ. ඒ පොලිස් කෝලමය. දිනපතා සමාජ මාධ්‍යට ආතල් දෙන පොලිස්පතිගේ නාඩගම්, වේදිකාව මත පමණක් නොව සැබෑ ජීවිතයේ ද රජතුමාගේ ශ්‍රී දේහයේ සාරය උරා බොන මැස්සන්ට ටී 56න් වෙඩි තැබීමට ඉඩ ඇති ජනප්‍රවාදගත එනමුත් නූතන වඳුරන් බව ඉක්මනින් තේරුම් ගන්නා තරමට ඇඟට හොඳය.
