පාස්කු ඉරිදා ප්‍රහාර සම්බන්ධ පරීක්ෂණය අවසන් කිරීමට හෝ තීරණාත්මක අත්අඩංඟුවට ගැනීමට ජනාධිපති දිසානායක සහ කාදිනල් මැල්කම් රංජිත් දින දීම නිසා රහස් පොලිස් නිලධාරීන් දුෂ්කර අඩියකට වැටී තිබෙන බව පොලිස් ආරංචි මාර්ග කියයි.
ගෝඨාභය සහ රනිල් රාජපක්ෂ පාලන කාලයේ දී එම පරීක්ෂණය සම්පූර්ණයෙන්ම වසා දමා තිබුණි. අපේ ආරංචි මාර්ගයන්ට අනුව සමහර සාක්ෂි විනාශ කර තිබේ.
වර්ථමාන ආණ්ඩුව බලයට පැමිනීමෙන් පසු ජමීල් නම් ස්වයං ඝාතක සැකකරු පුපුරුවා ගත් බවට සැක කළ දෙහිවල ඉන් අසළ නූස් පොල් ගසක තීබී කාන්තාවක් විසින් සොයා ගන්නා ලද ජංගම දුරකථනයක් දෙහිවල පොලීසියේ ලාච්චුවක පුස්කමින් තිබියදී සොයා ගන්නා ලද්දේ නව ආණ්ඩුව යටතේ පාස්කු ප්‍රහාරය පිළිබඳ පරීක්ෂණ ආරම්භ කිරීමෙන් පසුය.
එම ජංගම දුරකතනය පිළිබඳ පරීක්ෂණය තවම අවසන් නැති බව දැන ගන්නට තිබේ.
එමෙන්ම ජමීල් සමඟ යුද හමුදා බුද්ධි ප්‍රධානියාට ඉතා කිට්ටු සබඳතාවයක් තිබූ බවට ද සාක්ෂි හෙළිදරව් වී තීබේ.
එසේ නමුත් සහරාන් කණ්ඩායම තුලට රාජ්‍ය බුද්ධි සේවය සහ යුද හමුදා බුද්ධි අධ්‍යක්ෂ මණ්ඩලය විසින් රිංගවන ලද ඔත්තුකරුවන් කිසිවකු ප්‍රශ්ණ කිරීම සඳහා කැඳවීමට නොහැකිවී ඇතැයි විශ්වාසවන්ත ආංරචි මාර්ග සඳහන් කරයි.
තවද ගෝඨාභය රාජපක්ෂ ජනාධිපති සමයේ දී එම පරීක්ෂණ නතර කිරීම නිසා වැදගත් සාක්ෂි අස්ථාන ගතවී ඇතැයි ද වාර්තා වේ.
චැනල් 4 රෑපවාහිනී නාලිකාවට පාස්කු ප්‍රහාර සහ පිල්ලෙයාන් ගේ සම්බන්ධයක් ඇතැයි ප්‍රකාශයක් කළ හන්සීර් අසාද් මවුලානාගෙන් ප්‍රකාශයක් ගැනීම පිනිස ඔහු ලංකාවට කැඳවනු ඇතැයි පළ වූ වාර්තා ද තවම සත්‍යක් වී නැත. ස්විස්ටර්ලන්තයේ දේශපාලන රැකවරණ ලබා සිටින ඔහුට ලංකාවට යන්නේ නම් එම රැකවරණය අහෝසි වෙයි.
දේශපාලන රැකවරණ පිට සිටින පුද්ගලයින්ට තමන් පලා ආ රට හැර අන් ඕනෑම රටකට සංචාරය කළ හැකිය. මවුලානාට දේශපාලන රැකවරණය ඉවත් කළහොත් සිදු වන්නේ ශ්‍රී ලංකා ගමන් බලපත්‍රයක් ලබා ගැනීමටය. එවිට ඔහුට ලබා දී ඇති සරණාගත ආරක්ෂාව නැති වේ.
අනෙත් අතට ශ්‍රී ලංකාව, එක්සත් ජාතීන්ගේ මානව හිමිකම් කවුන්සිලය විසින් පිහිටුවා ඇති ශ්‍රී ලංකාවේ මානව හිමිකම් කෙළෙසීම් සම්බන්ධ සාක්ෂි රැස්කිරීමේ යාන්ත්‍රණය පිළිනොගන්නා බැවින් එයට මවුලානා විසින් දී ඇති සාක්ෂිය නිල වශයෙන් ලබා ගත නොහැක.
එසේ නමුත් මවුලානා විසින් එය යාණ්ත්‍රණයට හෝ වෙනත් රාජ්‍ය නොවන සංවිධානයකට දෙන ලද දීර්ඝ ප්‍රකාශයක් ලංකාවේ පරීක්ෂකයින් සහ විපාක්ෂික (සජබ) දේශපාලනඥයින් කිහිප දෙනෙකුට ලැබී තිබේ. නමුත් එහි නීතිමය වැදගත්කමක් නැත. එම ප්‍රකාශය අප සතුවද තිබේ. එහි වැදගත් කරුණූ ගණනාවක්ම තිබේ.
පිල්ලෙයාන් සිරගතව සිටි අවදියෙහි දී සහරාන්ගේ සහෝදරයකු වූ සෙයිනි මවුලවි ද සිරගතව සිටි බවත් ඔවුන් දෙදෙනා සමීප ඇසුරක් පැවැත් වූ බවත් සනාථ වී තිබේ.
අපේ ආරංචි මාර්ග සඳහන් කරන්නේ සාක්ෂි වසං කළ බවට පහළ පොලිස් නිලධාරියකු අත්අඩංගුවට ගැනීම හැර මේ අවස්ථාවෙහි දී වෙනත් කිසිම බරපතල සොයා ගැනීමත් හෙළිදරව් කිරීමට සූදානමක් නැති බවයි.
මේ නිසා පාස්කු ප්‍රහාර සම්බන්ධ පරීක්ෂණ සම්බන්ධයෙන් වැදගත් තොරතුරු මෙම මස 21 දිනට පෙර හෙළිකරන බවට ජනාධිපති අනුර කුමාර දිසානායක කළ ප්‍රකාශය ගැන පරීක්ෂකයින් මවිත වී තිබේ.
නව ආණ්ඩුව පත් වී නව පරීක්ෂණ අරඹා මාස හතරක් වැනි කාලයක් තුල ප්‍රතිපල ඉල්ලා සිටීම යථාර්තවාදී නොවන බව පළපුරුදු පොලිස් පරීක්ෂකයෝ කියති.
