ගුරු-විදුහල්පති සේවාවල පවතින වැටුප් විෂමතා ඉවත් කිරීමට බලකරමින් 2021.07.12 දින සිට සියලු ගුරු විදුහල්පතිවරු වෘත්තීය ක්‍රියාමාර්ගවල නිරතව සිටින අතර, මේ වන විට එම වෘත්තීය ක්‍රියාමාර්ග දින 71 ක් දක්වා ඉදිරියට පැමිණ ඇත.
එසේ තිබියදී අද දිනයේ (2021.09.21) අපරාධ පරීක්ෂණ දෙපාර්තමේන්තුවට කැඳවන ලද ගුරු විදුහල්පති වෘත්තීය ක්‍රියාමාර්ගවල නිරතව සිටින ශ්‍රී ලංකා ජාතික විදුහල්පති සංගමයේ සභාපති මොහාන් පරාක්‍රම වීරසිංහ මහතා සහ ස්වාධීන අධ්‍යාපන සේවක සංගමයේ සාමාජිකාවක වන මිනුවන්ගොඩ ප්‍රදේශයේ ගුරුවරියක උදෑසන 10.00 සිට මෙම නිවේදනය නිකුත් කරන ප.ව. 2.00 වන විටත් අපරාධ පරීක්ෂණ දෙපාර්තමේන්තුවේ රඳවා සිටී.
සැප්තැම්බර් 16 දින අණ්ඩුවට සම්බන්ධ වෘත්තීය සමිතියක් වන පොදු ජන අධ්‍යාපන සේවක සංගමයේ පිරිසක් වර්ජනයේ නිරත නොවන ගුරුවරුන්ට තර්ජනය කරන බවට සරත් වීරසේකර අමාත්‍යවරයාට පැමිණිල්ලක් සිදු කළ බව ප්‍රකාශ විය. ඉන් පසු සැප්තැම්බර් 17 දින සරත් වීරසේකර අමාත්‍යවරයා මාධ්‍ය සාකච්ඡාවක් පවත්වමින් ගුරු විදුහල්පතිවරුන්ගේ වෘත්තීය ක්‍රියාමාර්ගය ත්‍රස්තවාදී ක්‍රියාවක් ලෙස හඳුන්වමින් වර්ජනයට සහභාගි නොවන ගුරුවරුන්ට තර්ජනය කරන බවට තමන්ට පැමිණිලි ලැබී ඇති බව පවසමින් ඒ සම්බන්ධයෙන් කටයුතු කිරීමට අපරාධ පරීක්ෂණ දෙපාර්තමේන්තුවට දැනුම් දී ඇති බව ප්‍රකාශ කරන ලදී. එදිනම පොලිස් මූලස්ථානය ද නිවේදනයක් නිකුත් කරමින් එවැනි තර්ජන සිදුවන්නේ නම් 119 දුරකතන අංකයට හෝ ළඟම පොලිස් ස්ථානයට පැමිණිලි කරන ලෙස දැනුම් දෙන ලදී.
මෙම දැනුම්දීම්වලින් පසු සැප්තැම්බර් 18 වන දින ඉහත සඳහන් කළ විදුහල්පතිවරයා සහ ගුරුවරියට අපරාධ පරීක්ෂණ දෙපාර්තමේන්තුවට පැමිණෙන ලෙස දුරකතන ඇමතුම් මගින් දැනුම් දී තිබූ අතර, ඔවුන් අද දින පැමිණිය හැකි බව දැනුම් දෙන ලදී. අනතුරුව පොලීසියෙන් ඔවුන්ගේ නිවෙස්වලට ද පැමිණ අදාළ කැඳවීම සිදු කරන ලද අතර, ඔවුන් අද දින අපරාධ පරීක්ෂණ දෙපාර්තමේන්තුවට කැඳවන ලදී.
වෘත්තීය සමිති ආඥා පනතට අනුව වෘත්තීය ක්‍රියාමාර්ග සම්බන්ධයෙන් ගුරු විදුහල්පතිවරු දැනුවත් කිරීමට නීත්‍යානුකූල අයිතියක් ඇති අතර, සියලු ගුරු විදුහල්පතිවරු ස්වේච්ඡාවෙන් වෘත්තීය ක්‍රියාමාර්ගයේ අඛණ්ඩව නිරත වෙමින් සිටී.
මේ තත්වය තුළ මෙම වෘත්තීය අරගලයට දිගින් දිගටම විවිධ අවලාද නගමින් සිටින පොදු ජන අධ්‍යාපන සේවක සංගමය විසින් ආණ්ඩුවේ උවමනාව මත සිදු කරන ලද කුමන්ත්‍රණ ක්‍රියාවලියක් ලෙස ගුරු විදුහල්පතිවරු මෙලෙස අපරාධ පරීක්ෂණ දෙපාර්තමේන්තුවට කැඳවීම හැදින්විය හැකිය. තර්ජනයක් පැවතියේ නම් පොලීසියට පැමිණිලි නොකර සරත් වීරසේකර ඇමතිවරයාට පැමිණිලි කිරීමෙන්ම එය පැහැදිලි වේ.
මෙවැනි කුමන්ත්‍රණකාරී ක්‍රියාමාර්ගවලින් ගුරු විදුහල්පති අරගලය නතර කිරීමට හෝ ගුරු විදුහල්පතිවරු බිය ගැන්වීමට නොහැකි බව අවධාරණය කරන අප, ආණ්ඩුවෙන් ඉල්ලා සිටින්නේ මෙවැනි නාටකීය ක්‍රියාමාර්ග නවතා ගුරු විදුහල්පතිවරුන්ගේ වැටුප් විෂමතා ගැටලුවට පිළිගත හැකි සාධාරණ විසඳුමක් ලබාදීමට කටයුතු කරන ලෙසයි.
ගුරු-විදුහල්පති වෘත්තීය සමිති සන්ධානය වෙනුවෙන්,
ජෝසප් ස්ටාලින් මහින්ද ජයසිංහ
0773112541 0718297022