බූස්ස බන්ධනාගාරයෙහි විශේෂ කාර්ය බලකාය යෙදවිමට එරෙහිව අභියාචනාධිකරණයේ රිට් පෙත්සමක්

සිරකරු අයිතිවාසිකම් මූලික කරගත් සංවිධානයක් වන සිරකරු අයිතීන් ආරක්ෂා කිරීමේ කමිටුව (CPRP) සහ බූස්ස බන්ධනාගාරයේ රඳවා සිටින සිරකරුවන් කිහිප දෙනෙකු එක්ව, බූස්ස බන්ධනාගාරය තුළ විශේෂ කාර්ය බලකාය (STF) නිලධාරීන් නීති විරෝධී ලෙස සහ අඛණ්ඩව යොදවා ඇති බවට චෝදනා කරමින් අභියාචනාධිකරණය හමුවේ රිට් පෙත්සමක් ගොනු කර තිබේ.

මෙම පෙත්සම 2026 මාර්තු මස 20 වන දින ගොනු කරන ලදී.

ප්‍රධාන චෝදනා

විශේෂ කාර්ය බලකා නිලධාරීන් බන්ධනාගාරය තුළ ස්ථිරව ස්ථානගත වී සිරකරුවන්ගේ සහ නීතිඥයන් ඇතුළු අමුත්තන් නිතර පරීක්ෂා කිරීම සිදු කරන බවත්, නීතියට අනුව බන්ධනාගාර නිලධාරීන්ට පමණක් පවරා ඇති රාජකාරි ඉටු කරන බවත් පෙත්සම්කරුවෝ කියා සිටිති. මෙම ක්‍රියාමාර්ග,

• සිරකරුවන්ට සහ අමුත්තන්  බිය ගන්වන සුළු බවත්,

• බලතල සීමාව ඉක්මවා ක්‍රියාත්මක වන බවත්,

• බන්ධනාගාර පනත උල්ලංඝනය කරන බවත්,

• බන්ධනාගාර ක්‍රමයේ ආයතනික ස්වාධීනත්වයට තර්ජනයක් වන බවත්

පෙත්සම්කරුවෝ වැඩිදුරටත් අවධාරණය කරති.

බන්ධනාගාර බලධාරීන්ගේ අපොහොසත්කම

විශේෂ කාර්ය බලකායට බන්ධනාගාර භූමිය තුළ ක්‍රියාත්මක වීමට සහ සාමාන්‍ය පරිපාලන හා ආරක්ෂක කටයුතු සිදු කිරීමට ඉඩ සලසා දීමෙන් බන්ධනාගාර බලධාරීන් තම ව්‍යස්ථාපිත වගකීම් අත්හැර දමා ඇති බවද මෙම පෙත්සම මගින් වැඩිදුරටත් චෝදනා කරයි.

උපුටා දක්වන ලද නීතිමය පදනම

මෙම පෙත්සම බන්ධනාගාර පනතේ විධිවිධාන, විශේෂයෙන්ම 6(2), 10(2), 12, 13, සහ 33 වගන්ති මත ප්‍රබලව පදනම් වේ. එම වගන්ති මගින්,

• බන්ධනාගාර කොමසාරිස් ජනරාල්ගේ අධිකාරිය

• සිරකරුවන්ගේනීත්‍යනුකූල භාරකාරත්වය

• බන්ධනාගාර විනය කළමනාකරණය

• පරීක්ෂා කිරීමට  සහ අවශ්‍ය බලය භාවිතා කිරීමට බන්ධනාගාර නිලධාරීන්ට ඇති බලය

යන කරුණු නිර්දේශ කර ඇත. සාමාන්‍ය පරිශෝධන සහ භාරකාරත්ව රාජකාරි විශේෂ කාර්ය බලකාය විසින් සිදු කළ නොහැකි බව මෙම වගන්ති පැහැදිලිව පෙන්වා දෙන බව පෙත්සම්කරුවෝ තර්ක කරති.

අනුබල දෙන සාධක

මෙම පෙත්සමට ඇතුළත් කර ඇති සාධක පහත දැක්වේ:

• විශේෂ කාර්ය බලකායේ හැසිරීම විස්තර කරමින් සිරකරුවන් විසින් සපයන ලද දිවුරුම් ප්‍රකාශ (X1, X2, X3 ලෙස සලකුණු කර ඇත)

• 2026 පෙබරවාරි මාසයේදී වගඋත්තරකරුවන් වෙත යවන ලද ඉල්ලීම් ලිපි (X4, X5 ලෙස සලකුණු කර ඇත)

• බූස්ස බන්ධනාගාරය තුළ විශේෂ කාර්ය බලකාය යොදවා ඇති ස්ථාන පෙන්වන සැලසුම් සිතියම (X6, X7 ලෙස සලකුණු කර ඇත)

ඉල්ලා සිටින සහන

පෙත්සම්කරුවෝ අභියාචනාධිකරණයෙන් ඉල්ලා සිටින්නේ,

• බන්ධනාගාර තුළ සාමාන්ය විශේෂ කාර්ය බලකාය  සිටීමට අවසර දෙන ඕනෑම තීරණයක් අවලංගු කරන ලෙසට (සර්ටියෝරාරි රිට් ආඥාව)

• බන්ධනාගාර පනත යටතේ තම ව්‍යස්ථාපිත රාජකාරි නැවත ආරම්භ කරන ලෙස බන්ධනාගාර බලධාරීන්ට බල කරන ලෙසට (මැන්ඩාමුස් රිට් ආඥාව)

• පරිශෝධන පැවැත්වීමෙන් හෝ බන්ධනාගාර ආශ්රිත කාර්යයන් ඉටු කිරීමෙන් විශේෂ කාර්ය බලකා නිලධාරීන් වළක්වන ලෙසට (ප්‍රොහිබිෂන් රිට් ආඥාව)

• අවසන් විනිශ්චය තෙක් බන්ධනාගාරය තුළ විශේෂ කාර්ය බලකාය ක්‍රියාත්මක වීම වළක්වන අතුරු ආඥා නිකුත් කරන ලෙසට

එසේම පෙත්සම්කරුවෝ වියදම් සහ අධිකරණය සුදුසු යැයි සලකන වෙනත් ඕනෑම සහනයක් ද ඉල්ලා සිටිති.

මෙම නඩුව බන්ධනාගාර පරිපාලනයේ බලතල වෙන් කිරීම සහ නීතියේ ආධිපත්යය පිළිබඳ වැදගත් ප්‍රශන  මතු කරන බැවින්, අභියාචනාධිකරණයේ විභාගය සමාජයේ විශේෂ අවධානයට ලක්ව තිබේ.