සජීව චාමිකර, ඉඩම් හා කෘෂිකර්ම ප්රතිසංස්කරණ ව්යාපාරය
මොනරාගල දිස්ත්රික්කයේ වැල්ලවාය ප්රාදේශීය ලේකම් කොට්ඨාශයට අයත් කඩවර වැව ආශ්රිත වනාන්තර අක්කර 250 ක් කෘෂි ව්යාපාරිකයන් කිහිපදෙනෙකු අතර බෙදා දීමට ජාතික ජන බලවේගයේ මොනරාගල දිස්ත්රික් පාර්ලිමේන්තු මන්ත්රිනී චතුරි ගංගානි සූදානම් වේ. ලුණුගම්වෙහෙර ජාතික වනෝද්යානයේ සිට හඳපානාගල වැව දක්වා අලින් සංක්රමණය වන දෙමලිය – වන්දම අලි මංකඩ රක්ෂිතයක් බවට ප්රකාශයට පත් කිරීම සඳහා රාජ්ය නිලධාරීන් සමඟ නිරීක්ෂණ චාරිකාවකට සහභාගී වන අතරතුර ඇය විසින් නිලධාරීන්ට නියෝග කර ඇත්තේ මෙම ඉඩම් සියල්ල කඩිනමින් බෙදා දීමට පියවර ගන්නා ලෙස ය.
දෙමලිය – වන්දම අලි මංකඩ හා සම්බන්ධ කඩවර වැව ආශ්රිත මෙම රජයේ වනාන්තර ඉඩම් බෙදා දීමෙන් දැවැන්ත අලි – මිනිස් ගැටුමක් නිර්මාණය කරමින් මන්ත්රිවරිය විසින් ක්රියාත්මක කිරීමට සූදානම් වන්නේ පසුගිය ආණ්ඩු පැවති සමයේ දී ප්රදේශයේ දේශපාලඥයන් විසින් ක්රියාත්මක කළ ඉඩම් කොල්ලය ම වීම කනගාටුවට කරුණකි. හිටපු පාර්ලිමේන්තු මන්ත්රි, වැවිලි කර්මාන්ත නියෝජ්ය අමාත්ය හා මොනරාගල දිස්ත්රික් සම්බන්ධීකරණ කමිටුවේ හිටපු සභාපති ජගත් පුෂ්පකුමාර විසින් සිදු කළ ආකාරයට ම දැවැන්ත අලි – මිනිස් ගැටුමක් නිර්මාණය කරමින් රජයේ වනාන්තර ඉඩම් ජාවාරම්කරුවන් කිහිපදෙනෙකු අතර බෙදා දීමට වර්තමාන රජයේ චතුරි ගංගානි මන්ත්රිනිය ද සූදානම් වීමෙන් පෙනී යන්නේ ජාවාරම්කරුවන් කිහිපදෙනෙකු විසින් සමස්ත දේශපාලන යාන්ත්රණය ම හසුරුවන බව ය.
මෙම වනාන්තර ප්රදේශයේ අලි – ඇතුන් 120 ක් පමණ ජීවත් වන අතර මෙම ඉඩම් බෙදා දීම හේතුවෙන් මෙම සතුන් ගේ වාසස්ථාන අහිමි වීමෙන් තෙලුල්ල, ඇතිලිවැව, කිතුල්කොටේ, උල්කන්ඳ, හඳපානාගල සහ පැල්වත්ත ජනපද ලෙස පවතින බ්ලොක් 16 හා 14 යන ගම්මානවලට හා වගා බිම්වලට අලි – ඇතුන් පිවිසීම වර්ධනය වී දරුණු අලි – මිනිස් ගැටුමක් නිර්මාණය වනු ඇත.
හෙක්ටයාර 2694 ක් පුරා ව්යාප්ත ව ඇති දෙමලිය – වන්දම – කුඩාඔය රජයේ වනාන්තරය තුළ හා ඊට මායිම් ව කඩවර වැව, පරළු වැව, දෙමලිය වැව, හුරත්ගමුව වැව හා ගුනේරිස් වැව පිහිටා තිබේ. මෙම වනාන්තර ප්රදේශය මෙම වැව්වල මෙන් ම කිරිදි ඔයේ ජල පෝෂක ප්රදේශ වෙති. මීට අමතර ව මෙම වනාන්තර ප්රදේශය උමා ඔය බහුකාර්යය ව්යාපෘතිය යටතේ දෙමලිය – වන්දම වන අලි කළමනාකරණ රක්ෂිතය ලෙස ප්රකාශයට පත් කිරීමට යෝජනා වී තිබේ.
වන සංරක්ෂණ ආඥාපනත උල්ලංඝනය කිරීම
දෙමලිය – වන්දම – කුඩාඔය රජයේ වනාන්තරය, දෙමලිය – කුඩාඔය යෝජිත රක්ෂිතය ලෙස නම් කර ඇති අතර 2009 අංක 65 දරන පනතින් අවසන්වරට සංශෝධිත වන සංරක්ෂණ ආඥාපනතේ 20(1) වන වගන්තියට අනුව රජයේ වනාන්තරයක් ලෙස මෙම ප්රදේශය පාලනය වේ. එම වගන්තියට අනුව එවැනි වනාන්තරයක ශාක කපා ඉවත් කිරීම, වගා කිරීම, තාවකාලික හෝ ස්ථිර ගොඩනැගිලි ඉදි කිරීම හා පදිංචි වී සිටීම, මාර්ග සකස් කිරීම හා භාවිත කිරීම වරදකි. එවන් වරදකට අධිකරණයෙන් වරදකරුවකු කරන පුද්ගලයකු වසර 2 ක් දක්වා බන්ධනාගාර ගත කිරීමකට හෝ රුපියල් 5000 ත් 50,000 ත් අතර දඩයකට හෝ මෙම දණ්ඩනයන් දෙකට ම යටත් කළ හැකි ය. මෙම දඩුවමට අමතර ව රජයේ වනාන්තරයට කරන ලද හානිය සඳහා අධිකරණය විසින් නියම කරන දඩයකට ද යටත් කළ හැකි ය. මෙම ආඥාපනතේ 20(2) වගන්තියේ සඳහන් වන ආකාරයට රජයේ වනාන්තරයක නීති විරෝධී ක්රියාවක නිරත වීමට ආධාර හා අනුබල ලබා දීම ද වරදක් වන අතර එවන් පුද්ගලයකු මෙම දඩුවම්වලට ම යටත් කළ හැකි ය.
මෙවන් වූ නීතිමය තත්ත්වයන් යටතේ පාලනය වන දෙමලිය – වන්දම – කුඩාඔය රජයේ වනාන්තරයට අයත් කඩවර වැව ආශ්රිත වනාන්තර පද්ධතිය විනාශ කිරීමට නියෝග කිරීමෙන් මන්ත්රිනී චතුරි ගංගානි සිදු කර ඇත්තේ නීති විරෝධී ක්රියාවක නිරත වීමට ආධාර හා අනුබල ලබා දීමකි.
පොහොසත් රටක් ලස්සන ජීවිතයක් අහිමි කිරීම
වත්මන් ආණ්ඩුව බලයට පත් වීමට ප්රථම ජනතා ව සමඟ සම්මුතිගත වූ “පොහොසත් රටක් ලස්සන ජීවිතයක්” ප්රතිපත්ති ප්රකාශනයේ තිරසර ජෛව ලෝකයක් – සදාහරිත ජීවිතයක් කොටසෙහි මූලධර්ම ලෙස දක්වා ඇත්තේ පාරිසරික යුක්තිය හා සාධාරණත්වය, පරිසර පද්ධති ප්රවේශය, පාරිසරික යහපාලනය හා පාරිසරික ආරක්ෂාව යන සංකල්පයන් ය. එපමණක් නොව සංවේදී පාරිසරික කලාප ප්රකාශයට පත් කර සුරක්ෂිතතාව තහවුරු කිරීම වැනි සාධනීය කරුණු ගණනාවක් සඳහන් කර තිබේ. එපමණක් නොව මෙහි සඳහන් කර ඇත්තේ අලි – මිනිස් ගැටුම පාලනය කිරීමට අලි ගහනය, සංචරණ රටා හා වාසස්ථාන පිළිබඳ ව නිසි අධ්යයනයක් සිදු කර ජීව විද්යාත්මක හා නව තාක්ෂණික ක්රමවේද භාවිත කරමින් ජන සහභාගීත්ව වැඩසටහන් ක්රියාත්මක කරන බව ය.
නමුත් මේ සියල්ල උල්ලංඝනය කරමින් පාර්ලිමේන්තු මන්ත්රිනී චතුරි ගංගානි සූදානම් වන්නේ අලි – ඇතුන් පමණක් නොව ප්රදේශවාසීන් ව ද දැවැන්ත අනතුරකට ලක් කිරීමට ය. මේ පිටුපස සිටින රජයේ ඉඩම් අත්පත් කර ගෙන මහ පරිමාණයෙන් වගා කටයුතු සිදු කරන පුද්ගලයන් පිළිබඳ අවබෝධයකින් තොර ව මෙම ක්රියාමාර්ග ගැනීමට අමාත්යවරිය කටයුතු කරන්නේ ද යන්න ගැටළුවකි.