(Sri Lanka Brief/ 03 October 2025) දශක ගණනාවක් තිස්සේ හමුදා අත්පත් කර ගැනීම් සහ නිලධාරිවාදී වැරදි කළමනාකරණයෙන් පසු, නිවැරදි කිරීමේ පියවරක් ලෙස, වන්නියේ ඉඩම් අක්කර 101,762.75 ක් රාජ්‍ය පාලනයෙන් නිදහස් කිරීමට නියමිත බව පරිසර අමාත්‍ය ධම්මික පටබැඳි පසුගියදා ප්‍රකාශ කර තිබේ.
දෙමළ ජනයාගේ ඉල්ලීම් සම්බන්ධයෙන් ආණ්ඩුව වඩා සාධනීය ප්‍රතිචාර දක්වන්නේ දින කිහිපයක දී ජිනීවා මානව හිමිකම් කවුන්සිලයෙහි ශ්‍රී ලංකාව පිිළිබද බටහිර රටවලින් ඉදිරිපත් කර ඇති යෝජනාවට ඡන්ද විමසීම සිදුවන අතරතුරය.
වවුනියා දිස්ත්‍රික් ලේකම් කාර්යාල ශ්‍රවණාගාරයේදී කතා කරමින් පටබැඳි කියා සිටියේ, පසුගිය GPS සමීක්ෂණවලදී අනුප්‍රාප්තික රජයන් විසින් ගම්මාන, ගොවිපලවල්, පාසල් සහ රෝහල් පවා “වැරදි ලෙස” වනාන්තර රක්ෂිතවලට අවශෝෂණය කර ඇති බවයි. “නීත්‍යානුකූලව ජනතාවට අයත්” ඉඩම් දැන් විධිමත් ආකාරයකින් නිදහස් කරන බවට ඔහු ප්‍රතිඥා දුන්නේය.
GPS සමීක්ෂණයක් යනු මගින් පෘථිවි පෘෂ්ඨයේ ලක්ෂ්‍යවල නිරවද්‍ය භූගෝලීය ඛණ්ඩාංක (අක්ෂාංශ, දේශාංශ සහ උන්නතාංශය) නිවැරදිව තීරණය කිරීමට සහ වාර්තා කිරීමට කක්ෂගත චන්ද්‍රිකා සහ භූමි පාදක ග්‍රාහක ජාලයක් භාවිතා කරන ක්‍රමවේදයකි. එමගින් ඉදිකිරීම් වැනි පුළුල් පරාසයක යෙදුම් සඳහා සවිස්තරාත්මක සිතියම්ගත කිරීම සහ මැනීමට හැකිය.
නියෝජ්‍ය අමාත්‍ය ඇන්ටන් ජයකොඩි, පාර්ලිමේන්තු මන්ත්‍රී එම්. ජෙගතීස්වරන්, දිස්ත්‍රික් ලේකම් සරත් චන්ද්‍ර, ප්‍රාදේශීය ලේකම්වරුන් සහ අනෙකුත් නිලධාරීන් ද මෙම රැස්වීමට සහභාගී වූහ. මධුර නගර් හි උද්භිද උද්‍යානයක් සහ වන්නිවිලන්කුලම් හි පරිසර උද්‍යානයක් ස්ථාපිත කිරීම පිළිබඳව ද රැස්වීමේදී සාකච්ඡා කරන ලදී.
දශක ගණනාවක් තිස්සේ වන්නිය පුරා බලහත්කාරයෙන් අවතැන් වූ දෙමළ ජනතාව තම නිවාස සහ ගොවිබිම් නැවත ලබා ගැනීමට සටන් කර ඇති අතර, ඉඩම් කරා ප්‍රවේශය අත්හිටුවීම සාධාරණීකරණය කිරීම සඳහා පාරිසරික රෙගුලාසි නිතර උපුටා දක්වා තිබේ. උතුරු-නැගෙනහිර ඉඩම් අත්පත් කර ගැනීම සඳහා ආවරණයක් ලෙස වන සංරක්ෂණ ප්‍රතිපත්ති භාවිතා කරන බවට මානව හිමිකම් සංවිධාන සහ ප්‍රාදේශීය උද්ඝෝෂකයින් දිගු කලක් තිස්සේ රජයට චෝදනා කර ඇත.
අක්කර 101,762 ක් ආපසු ලබා දෙන බවට කරන ලද නිවේදනය, ඉඩම් අහිමි කිරීමේ පරිමාණය සහ දෙමළ ජනතාව මුහුණ දෙන ඉඩම් අර්බුදය විසඳීමට රජය දිගු කලක් තිස්සේ ප්‍රතික්ෂේප කිරීම යන දෙකම ඉස්මතු කරයි.
මෑත වසරවලදී උතුරු හා නැගෙනහිර ප්‍රදේශවල සීමිත භාරදීම් දක්නට ලැබුණද, විශාල ඉඩම් ප්‍රමාණයක් අත්පත් කර ගැනීම හෝ රාජ්‍ය ව්‍යාපෘති සඳහා නම් කිරීම දිගටම කරගෙන යන බැවින් පවුල් පීඩනයට ලක්ව සිටින අතර, හමුදාව කලාපය පුරා දැඩි පැවැත්මක් තවමත් පවත්වාගෙන යයි.
යුදකරණය කර ඇති උතුරු නැගෙනහිරින් අනවශ්‍ය යුද හමුදා පිරිස් ඉවත් කර ගන්නා බව පසුගිය දා ජනාධිපති අනුර කුමාර දිසානායක ප්‍රකාශ කළේ එක් වරක් යුද්ධයක් ඇති වූ නිසා තවත් වරක් යුද්ධයක් ඇතිවනු ඇතැයි පූරෝකතනය කිරීම වැරදි බව කියා සිටිමිනි.
ඉඩම් නිදහස් කිරීම සඳහා හෝ යුද හමුදා පිරිස් ඉවත් කර ගැනීම සඳහා තවමත් කාලරාමුවක් ලබා දී නොමැත. කාලරාමවක් ලබා නොදෙන පොරොන්දු ඉටු කිරීමට ඕනෑම කාලයක් ගතවිය හැකිය.
( ටැමිල් ගාර්ඩියන්හි පළ වූ ලිපියක කරුණූ ද අනුසාරයෙනි. පරිවර්ථනයක් නොවේ)