Monday, July 15, 2024

ප්‍රංශ වාමාංශිකයෝ ෆැසිස්ට්වාදීන්ට තිරිංග අදිති..! මැරීන් ලෙ පෙන්ගේ දෑත ශක්තිමත් කළ මැක්‍රොන්ගේ “ප්‍රායෝගිකවාදය”..!

 ප්‍රංශ ජනාධිපති එමානුවෙල් මැක්‍රොන් කාලයක් ජාත්‍යන්තර දේශපාලන තරුවකි. ඔහු ජනප්‍රියත්වයේ හිනිපෙත්තට නැග්ගේ වසර 2017 දී ජනාධිපතිධූරයට තේරී පත්වීමෙනි. එය ලෝක දේශපාලනය පුදුමයකට පත් කළ සිදුවීමක් විය. දේශපාලනයට නවකයෙකු වූ  ජනකාන්තවාදී මැක්‍රොන් ප්‍රංශයේ ප්‍රධාන දේශපාලන ධාරාවන් වන වාමාංශික සහ දක්ෂිණාංශික පක්ෂයන්ට එරෙහිව නව මධ්‍යවාදී (centrist) පක්ෂයක් බිහි කළේ ය. එයින් ස්වල්ප කාලයකට පසු ඔහු වසර 2017 ජනාධිපතිවරණය ජය ගන්නේ මේ නව පක්ෂය නියෝජනය කරමිනි.

පාඨලීගේ ප්‍රායෝගිකවාදියා…

එමානුවෙල් මැක්‍රොන්ගේ ජයග්‍රහණය පිළිබඳ ඒ දිනවල විශාල කථාබහක් ඇතිවූ අතර බොහෝ දෙනෙක් ඔහුව වීරයෙකු බවට පත් කළහ. දේශපාලන වම සහ දකුණට විකල්ප සූත්‍රයක් සොයාගත් ප්‍රායෝගිකවාදී (pragmatic) ජනකාන්තවාදී තරුණ නායකයෙකු ලෙස අපේ රටේ ද මැක්‍රොන්ව උඩ දැම්මේය. එහි ප්‍රධානියා වූයේ පාඨලී චම්පික රණවකය.  ඔහු අනුගමනය කිරීමට උත්සාහ කළේ ද මැක්‍රොන්ගේ සූත්‍රයයි.  පාඨලී චම්පික ද ජනතාව ඉදිරියේ ගොඩනැගීමට උත්සාහ කරන්නේ  ප්‍රායෝගිකවාදී නායක ප්‍රතිරූපයකි.

තරුණ මැක්‍රොන්ගේ දේශපාලන වාසනාව…

එහෙත් තරුණ මැක්‍රොන්ට ජනාධිපතිවරණය ජය ගැනීමට හැකි වූයේ කෙසේ ද? එය එක්තරා දේශපාලන වාසනාවකි, අහම්බයකි. එවකට බලයේ සිටි සමාජවාදී  පක්ෂයේ ජනාධිපති  ෆ්‍රැන්කොයිස් හොලන්ඩ් ජනතාව අතරේ පිරිහීමට ලක්ව තිබිණ. ඔහුගේ ජනප්‍රියත්වය කොතරම් පහත වැටුණේදයත්  ඔහු දෙවන වාරය සඳහා  ජනාධිපතිවරණයට  තරඟ කිරීමට පවා ඉදිරිපත් නොවීය. මැතිවරණයට තරඟ කළ  ජනප්‍රිය කොන්සර්වේටිව් නායකයාට මැතිවරණ ප්‍රචාරක ව්‍යාපාරය අතරේ මූල්‍ය අක්‍රමිකතා පිළිබඳ චෝදනා එල්ල විය. වාමාංශික සහ දක්ෂිණාංශික කඳවුරුවල සිදු වූ මේ පසු බැසීම් මධ්‍යවාදී  මැක්‍රොන්ගේ වාසියට හේතු විය.

අධිතක්සේරුවකට පත්වීමේ විපාක..

වම සහ දකුණ යන පැරැණි මතවාදී බෙදීම් යල් පැන ගිය දේශපාලනයක් බවත් මධ්‍යවාදීන් වැඩ කළ හැකි හොඳම ප්‍රායෝගිකවාදී ප්‍රතිපත්ති තෝරා ගත යුතු බව මැක්‍රොන් අවධාරණය කළේ ය. ඒ විශ්වාසය අනුව වමට සහ දකුණට ඔහු තමන් සමඟ එක්වන ලෙසට ඔහු ආයාචනා කළේ ය. මේ උපාය යම් කාලයක් සාර්ථක වූ අතර මැක්‍රොන් තම මධ්‍යවාදී දේශපාලන කඳවුර ප්‍රසාරණය කිරීමට සමත්විය. එයට බලපෑ මූලික සාධකයක් වූයේ ඔහු මැරීන් ලෙ පෙන්ගේ ජාතික පෙරමුණ (National Front) (දැන් National Rally) නම් ෆැසිස්ට් දක්ෂිණාංශික පක්ෂය සහ ජීන්-ලූක් මෙලෙන්චොන් ගේ France Unbowed නම් දැඩි වාමවාදී පක්ෂ දෙක අතර ස්ථාන ගතවීමය. මේ සාර්ථක දේශපාලන ප්‍රවේශයෙන් ඔහු තම වැඩපිළිවෙළ පිළිබඳව අධිතක්සේරුවකට පත්විය. තම මධ්‍යවාදී දේශපාලන කඳවුර සඳහා සිදු කළ ආරාධනය ප්‍රතික්‍ෂේප කළ ඕනෑම අයෙක්  අන්තවාදියෙකු වශයෙන් අර්ථ දැක්වීමට ඔහු පසුබට නොවීය.

මැක්‍රොන්ට රෝම ජුපිටර් දෙවියා වැහීම…

මේ අධිතක්සේරුව,  ජනකාන්තවාදී මැක්‍රොන්ව උඩඟු අධිකාරවාදී ස්වරූපයකට තල්ලු කළේය. වසර 2017 ජනාධිපතිවරණය ජයගත් ඔහු තමන්ට රෝම ජුපිටර් (Jupiter) දෙවියා මෙන් ප්‍රංශ පාලනය කිරීමට අවශ්‍ය බව ප්‍රකාශ කළේ  තම උඩඟු ස්වරූපය ප්‍රංශ ජනතාවට ප්‍රදර්ශනය කරමිනි. මේ ප්‍රවේශය හේතුවෙන් ඔහු ඉක්මනින්ම ප්‍රංශ ජනතාව අතර වෛරයට ලක්වූ චරිතයක් විය. ඔහුට “රජ පිස්සුව” ඔළුවට ගසා ඇතැයි ප්‍රංශ ජනතාව චෝදනා කරති. මේ වන විට ඔහුගේ දේශපාලන වැඩ පිළිවෙල ජනතාවගෙන් සියයට 70 ක් ප්‍රතික්ෂේප කරති. වසර 2017 සහ 2022 ජනාධිපතිවරණයන්හි  දෙවන වටයන්හිදී සාම්ප්‍රදායික ඩිගොල්වාදී රිපබ්ලිකන්  පක්ෂ මෙන්ම වාමාංශික, සමාජවාදී, කොමියුනිස්ට් පක්ෂ  මැක්‍රොන්ට සහය දුන්හ. ඒ සහය ලැබුණේ ෆැසිස්ට් දක්ෂිණාංශික මැරීන් ලෙ පෙන් නම් පොදු සතුරා පරාජය කිරීම සඳහාය. එසේ නොමැතිව මැක්‍රොන්ගේ මධ්‍යවාදී දේශපාලන ප්‍රතිපත්ති ජයග්‍රහණය කිරීම සඳහා නොවෙයි.

මැක්‍රොන්ගේ විශ්‍රාම වැටුප් පිළිවෙත යනාදියට විරුද්ධ කහ කබා ව්‍යාපාරය ප්‍රංශය හෙල්ලුම් කැවුවේය.

ප්‍රංශ විශ්‍රාම වැටුපට කෙලවීම..

මැක්‍රොන් වාමාංශික සහ දක්ෂිණාංශික කඳවුරු දෙකේම “හොඳ” ප්‍රතිපත්ති උකහාගෙන ක්‍රියාත්මක කිරීමට උත්සාහ කළේ දෙපාර්ශවයේ ම සහයෝගය බලාපොරොත්තුවෙනි. එහෙත් සිදුවූයේ දෙපාර්ශවයම ඔහු සමඟ වෛර බැඳගැනීමය. නිදසුනකට ප්‍රංශ විශ්‍රාම වැටුප් ක්‍රමය සංශෝධනය ගත හැකිය. වසර 2023 දී මැක්‍රොන් නව නීතියක් සම්මත කරමින් විශ්‍රාම වයස 62 සිට 64 දක්වා ඉහළ දැමූ අතර විශ්‍රාම වැටුප ලබා ගැනීමට අවම වශයෙන් වසර 43ක සේවා කාලයක් සම්පූර්ණ කළ යුතු බවට කොන්දේසියක් පැනවීය. මේ සංශෝධනයට වාමාංශික පක්ෂ, වෘත්තීය සමිති මාරාන්තික විරෝධයක් දැක්වීය. දක්ෂිණාංශික පක්ෂ විශ්‍රාම වැටුප් ප්‍රතිසංස්කරණ ප්‍රමාණවත් නොවන බව පෙන්වා දුන්නේ ය.

පාර්ලිමේන්තු ඡන්දයකින් තොරව පනත් සම්මත කිරීම..

වසර 2022 මහ මැතිවරණයෙන්  මැක්‍රොන්ගේ Renaissance පක්ෂයට බහුතරයක් බලයක් නොලැබුණි. පක්ෂ ගණනාවක සහයෝගයෙන් දුර්වල සභාග ආණ්ඩුවක් පිහිටුවා ගැනීමට සිදු විය. ජනාධිපති මැක්‍රොන්ගේ ආර්ථික සමාජ ප්‍රතිසංස්කරණ පනත් සම්මත කර ගැනීමට පාර්ලිමේන්තුවේ සහයෝගයක් නොමැති අවස්ථාවන්හිදී ප්‍රංශ  ව්‍යවස්ථාවේ 49 (3) වගන්තිය අනුව ඡන්දයකින් තොරව එම පනත් සම්මත කර ගැනීමට ජනාධිපති මැක්‍රොන් කටයුතු කළේ ය. ජනතා විරෝධය මධ්‍යයේ ප්‍රංශ විශ්‍රාම වැටුප් සංශෝධන පනත සම්මත කළේ එම ව්‍යවස්ථා ප්‍රතිපාදනය උපයා්ගී කර ගනිමිනි. වසර 2022 සිට මේ දක්වා අවස්ථා විස්සකදී පමණ ව්‍යවස්ථාවේ 49 (3) වගන්තියට මුවාවී පාර්ලිමේන්තු ඡන්දයකින් තොරව පනත් සම්මත කිරීමට ජනාධිපතිවරයා මූලික විය.

මධ්‍යවාදී දේශපාලනය අන්ත දක්ෂිණාංශයට..

මැක්‍රොන්ගේ මධ්‍යවාදී දේශපාලන ක්‍රමයෙන් ඒකාධිපතිත්වයට සහ අන්තවාදයට ගමන් කළේ ය. ඔහුගේ දැඩි මතධාරී අභ්‍යන්තර කටයුතු ඇමති ජෙරල්ඩ් ඩාර්මනින්, ප්‍රංශයේ  ඉස්ලාම්වාදය ව්‍යාප්තවීම පිළිබඳව අන්ත දක්ෂිණාංශික ෆැසිස්ට්වාදී මැරීන් ලෙ පෙන් මෘදු ලෙස කටයුතු කරන බවට චෝදනා කිරීමට තරම් දුරදිග ගියේ ය. අන්ත දක්ෂිණාංශික ෆැසිස්ට් සංක්‍රමණ විරෝධීන් පසුගිය කාලය පුරා ඉල්ලා සිටි දැඩි නීති වෙනුවෙන්  ඇමති ජෙරල්ඩ් ඩාර්මනින් නව පනත් කෙටුම්පතක් ඉදිරිපත් කළේ ය.

ප්‍රතිපත්ති අනන්‍යතාවයක් නැති ජනප්‍රිය දේශපාලනයේ ඉරණම..

එහෙත් මේ ප්‍රතිපත්ති  මැක්‍රොන්ගේ මධ්‍යවාදී දේශපාලන කඳවුරට දක්ෂිණාංශිකයන් එකතු කිරීමට සමත් නොවුණි. මැක්‍රොන් බලයට පත් වූයේ මූලිකවම ඔහුගේ ජනකාන්තවාදී තරුණ ආකර්ෂණය හේතුවෙනි. ඔහු ආරම්භ කළ නව පක්ෂයට ප්‍රතිපත්ති අනන්‍යතාවයක් නොවීය. වමෙන් සහ දකුණෙන් ණයට ගත් ප්‍රතිපත්ති හැරෙන්නට මධ්‍යවාදී දේශපාලන අනන්‍යතාවයක් ගොඩනඟා ගැනීමට මැක්‍රොන්ට සහ ඔහුගේ නව පක්ෂය සමත් නොවුණි. පසුගිය ජූනි මාසයේ පැවති යුරෝපා පාර්ලිමේන්තු  මැතිවරණයේ දී මැක්‍රොන්ගේ මධ්‍යවාදී දේශපාලනයේ අසාර්ථකත්වය නැවත වරක් සනාථ කරනු ලැබීය.

යුරෝපා පාර්ලිමේන්තු මැතිවරණ පරාජය…

මැරීන් ලෙ පෙන්ගේ ෆැසිස්ට් දක්ෂිණාංශික National Rally පක්ෂය එම යුරෝපා පාර්ලිමේන්තු  මැතිවරණයේ දී කැපී පෙනෙන ජයක් ලබා ගත්තේ සියයට 31ක ඡන්ද ප්‍රමාණයක් ලබා ගනිමිනි. මැක්‍රොන්ගේ මධ්‍යවාදී සන්ධානයට ලබාගත හැකි වූයේ සියයට 14.6ක ඡන්ද ප්‍රතිශතයක් පමණි. වසර 2022 පැවති මහ මැතිවරණයේ දී මැරීන් ලෙ පෙන්ගේ ෆැසිස්ට් දක්ෂිණාංශික National Rally සමස්ත ඡන්ද ප්‍රමාණයෙන් ලබා ගත්තේ සියයට 19 (ආසන 89) ක් පමණි. වසරක කාලයේ  දී National Rally තම ඡන්ද ප්‍රමාණය සියයට 11කින් වර්ධනය කර ගෙන ඇත.

පූටින්ගේ ප්‍රංශ දේශපාලන සුරතලිය මැරීන් ලෙ පෙන්ය.

මැක්‍රොන්ගේ පිහිටෙන් ජයගත් ෆැසිස්ට්වාදීන්…

මැරීන් ලෙ පෙන්ගේ ෆැසිස්ට් දක්ෂිණාංශික National Rally පක්ෂයට මෙවැනි දැවැන්ත පිම්මක් පැනීමට හැකි වූයේ ජනාධිපති මැක්‍රොන්ගේ පිහිටෙනි. ඔහු බලයට පැමිණි අවස්ථාවේ එනම් වසර 2017  මහ මැතිවරණයේ දී National Rally පක්ෂයට හිමි වූයේ සියයට 5.5 (ආසන 7) ක් වැනි සුළු ඡන්ද ප්‍රතිශතයක් පමණි.  මැක්‍රොන් අනුගමනය කළ වැඩකරන ජනතාව ඉලක්ක කරගත් ජන පීඩක  ප්‍රතිපත්තිහි වාසිය හිමි වූයේ ෆැසිස්ට් දක්ෂිණාංශික National Rally පක්ෂයටය. ප්‍රංශ විශ්‍රාම වැටුප් ක්‍රම සංශෝධනය, ඉහළම ධනපතීන්ට ලබාදුන් බදු සහන, සමාජ සුබසාධන කප්පාදුව, ආර්ථික ප්‍රතිලාභ සාමාන්‍ය ජනතාවට නොලැබීම, විරැකියාව, පාලනයෙන් තොර උද්ධමනය ඇතුළු දැඩි ජනතා විරෝධයට ලක් වූ මැක්‍රොන්ගේ ක්‍රියා මාර්ගයන්හි දේශපාලන වාසිය හිමි වූයේ මැරීන් ලෙ පෙන්ට වූ අතර එම ජනතා කෝපය, විරෝධය සහ අසහනය තම ඡන්ද පදනම ඉහළ දමා ගැනීමට ඔවුහු ඉතා සියුම් ලෙස භාවිතා කළහ. හිට්ලර්, මුසලෝනි ඇතුළු සෑම ෆැසිස්ට් නායකයෙකුම බලය ඩැහැ ගැනීමට යොදා ගත්තේ සමාජ, ආර්ථික අර්බූද හරහා මතු වන ජනතා විරෝධයන් සහ අසහනයන්ය. මැරීන් ලෙ පෙන් ද එහි ව්‍යතිරේකයක් නොවෙයි.

මහ මැතිවරණ සූදුව…

යුරෝපා පාර්ලිමේන්තු  මැතිවරණ පරාජයෙන් පසුව ජනාධිපති මැක්‍රොන් පසුගිය ජූනි 9 වන දා පාර්ලිමේන්තුව විසුරුවා හැර  හදිසි මහ මැතිවරණයක් කැඳවීය. එය දේශපාලන සූදුවකි. වසර 2027 තෙක් සුළු බහුතරයකින් මැක්‍රොන්ට ප්‍රංශ පාර්ලිමේන්තුව බලය පවත්වාගෙන යෑමේ හැකියාව තිබිණි. එහෙත් ඒ බලය ඔට්ටුවට තබා ඔහු හදිසි මැතිවරණයක් කැඳවූයේ තම බලය වැඩිකර ගැනීමේ අරමුණ සහිතවය. ඔහු සුපුරුදු ලෙස ෆැසිස්ට් දක්ෂිණාංශික National Rally පක්ෂයට මෙන්ම වාමාංශික පක්ෂවලට දැඩි ප්‍රහාරයක් එල්ල කරමින් තම මධ්‍යවාදී දේශපාලන සන්ධානයට බලය ලබා දෙන ලෙසට ජනතාවගෙන් ඉල්ලා සිටියේ ය. එහෙත් පසුගිය ජුනි 30 වන දා පැවති ප්‍රංශ මහ මැතිවරණයේ පළමු වටයේ දී මැක්‍රොන්ගේ මධ්‍යවාදී දේශපාලන ප්‍රංශ ජනතාව පැහැදිලිව ප්‍රතික්ෂේප කළහ. මැරීන් ලෙ පෙන්ගේ ෆැසිස්ට් දක්ෂිණාංශික National Rally පක්ෂය සියයට 33ක්, සහ වාමාංශික, සමාජවාද, කොමියුනිස්ට, හරිත  New Popular Front සියයට 28ක් ඡන්ද ප්‍රතිශතයක් ලබා ගන්නා විට මැක්‍රොන්ගේ මධ්‍යවාදී සන්ධානයට හිමිවූයේ සියයට 20ක ඡන්ද ප්‍රමාණයක් පමණි.

ජීන්-ලූක් මෙලෙන්චොන් – ප්‍රංශ වාමාංශයේ නායකයා

ෆැසිස්ට්වාදීන් පරාජය කිරීමේ පෙරමුණක්…

ප්‍රංශ පාර්ලිමේන්තුවේ සමස්ථ ආසන සංඛ්‍යාව 557කි. බහුතර බලය ලබා ගැනීමට ආසන 279ක් අවශ්‍යය. ප්‍රංශ මහ මැතිවරණයේ පළමු වටයේ දී සියයට 50ට වඩා ඡන්ද ප්‍රතිශතයක් ලබා ගන්නා අපේක්ෂකයන් ජයග්‍රහණ කරන අතර එම සීමාව ලබා ගැනීමට නොහැකි වූ ආසන සඳහා දෙවන වටයේ ඡන්ද විමසීම පැවැත්වෙයි. සියයට 12.5 ට වඩා ඡන්ද ලබා ගත් අපේක්ෂකයෝ දෙවන වටයට සුදුසුකම් ලබති. මෙවර පළමු වටයේදී අපේක්ෂකයෝ 76ක් තේරී පත් වූහ. ඉතිරි ආසන සඳහා දෙවන වටයේ මහ මැතිවරණය ජූලි 7 වන දා (ඊයේ) පැවැත්විනි. දෙවන වටයේදී අඩු ඡන්ද සංඛ්‍යාවක් ලබාගත් අපේක්ෂකයෝ ස්වේච්ඡාවෙන් තරඟයෙන් ඉවත් වූහ. එහි අරමුණ ෆැසිස්ට් දක්ෂිණාංශික National Rally ජයග්‍රහණය වැළැක්වීමය. මෙවැනි පෙරමුණකට එක්වන ලෙසට ජනාධිපති මැක්‍රොන් වාමාංශිකයන්ගෙන් සහ ඩිගොල්වාදී දක්ෂිණාංශිකයන්ගෙන් ඉල්ලීමක් කළේ ය.  මේ අරමුණ වෙනුවෙන් මැක්‍රොන්ගේ මධ්‍යවාදී සන්ධානයේ සහ වාමාංශික හරිත සන්ධානයේ අපේක්ෂකයෝ 210 දෙනෙකු තරඟයෙන් ඉවත් වූහ. එහෙත් ඩිගොල්වාදී දක්ෂිණාංශිකයන් මැකරෝන්ගේ ඉල්ලීම නොතකා හැරි අතර ඔවුහු National Rally පක්ෂයේ ජයග්‍රහණය වෙනුවෙන් දායක වූහ.

වාමාංශික New Popular Front සන්ධානය ජය ගනියි…

ඉරිදා (7) පැවති දෙවන වටයේ මැතිවරණයේ දී National Rally පක්ෂය පරාජය කිරීමේ සන්ධාන උපාය මාර්ගය සාර්ථක විය. වාමාංශික New Popular Front සන්ධානය ආසන  188ක් (සියයට 26.3) ලබා ගෙන දෙවන වටය ජය ගත්තේ ය. එහෙත් ඔවුන්ට පාර්ලිමේන්තු බහුතරයක් ලබා ගැනීමට අවශ්‍ය ආසන 289 සීමාවට ලඟාවීමට නොහැකි විය. මැක්‍රොන්ගේ සන්ධානය ආසන 161ක් (සියයට 24.7) සහ ලෙ පෙන්ගේ ෆැසිස්ට් දක්ෂිණාංශික National Rally පක්ෂය ආසන 142ක් (සියයට 37.1) දිනා ගත්තේ ය. ප්‍රංශය ෆැසිස්ට්වාදයට ගොදුරුවීමේ අනතුර තාවකාලිකව පහව ගොස් තිබේ .

New Popular Front සන්ධානයේ සභාග ආණ්ඩුවක් …

මේ අනුව වාමාංශික New Popular Front සන්ධානයේ ප්‍රධානත්වයෙන් නව සභාග ආණ්ඩුවක් නිර්මාණය කර ගැනීම පිළිබඳ සාකච්ඡා ආරම්භ වී තිබේ. New Popular Front යනු ලිහිල් සන්ධානයකි. එමෙන්ම ඔවුහු මැකරෝන්ගේ විශ්‍රාම වැටුප් සංශෝධන පනත යළි හැරවීම, අවම මාසික වැටුපක් ස්ථාපිත කිරීම, පලස්තීන රාජ්‍යය පිලිගැනීම, සමාජ සුබ සාධන වැඩපිළිවෙළ ශක්තිමත් කිරීම වැනි ප්‍රගතිශීලී වැඩපිළිවෙළක් වෙනුවෙන් පෙනී සිටිති. ඔවුන් සහ මැක්රෝන්ගේ පක්ෂ සන්ධානය අතර ආණ්ඩුකරණ එකඟතාවක් ඇති කර ගැනීම ඉතා දුෂ්කර ව්‍යායාමයක් වනු ඇත. ජනාධිපති මැක්‍රොන් යනු ප්‍රංශ ජනතාවගේ වෛරයට සහ අප්‍රසාදයට ලක් වූ නායකයෙකි. New Popular Front සන්ධානයේ පක්‍ෂ අතර පවතින මතවාදී පරස්පරතාවන්ට මුවාවී, ජනාධිපති මැක්‍රොන් සිය Renaissance පක්ෂයේ නායකත්වය යටතේ සුළුතර ආණ්ඩුවක් බිහිකර ගැනීමට සිහින දකින බව ඇතැම් දේශපාලන විචාරකයෝ පෙන්වා දෙති.

වසර 2027 ජනාධිපතිධූරය මැරීන් ලෙ පෙන්ට?

ඔහුගේ පාලනය පිළිබඳව ප්‍රංශ ජනතාව අතරින් සියයට 70කගේ ප්‍රසාදයක් නැත. එබැවින් නව වාම සභාග ආණ්ඩුවට ජනතා ඉල්ලීම් සහ ගැටළුවලට විසඳුම් ලබාදීමේ ඉක්මන් වැඩපිළිවෙළකට යා යුතුය.  එසේ නොමැති වුවහොත් ෆැසිස්ට් දක්ෂිණාංශික National Rally පක්ෂය තවදුරටත් ශක්තිමත් වනු ඇති අතර වසර 2027 ජනාධිපතිවරණයෙන්  මැරීන් ලෙ පෙන් ජය ගනු ඇත.

හදිසි මැතිවරණයේ ජය National Rallyට..

පාර්ලිමේන්තුව විසුරුවා හැර හදිසි නව මැතිවරණයක් කැඳවීමේ  මැක්‍රොන්ගේ දේශපාලන සූදුවෙන් ජය හිමි වූයේ මැරීන් ලෙ පෙන්ගේ ෆැසිස්ට් දක්ෂිණාංශික National Rally පක්ෂයටය. වසර 2022 මහ මැතිවරණයෙන් සමස්ත ඡන්ද ප්‍රමාණයෙන් ලබා ගත්තේ සියයට 19ක් ලබා ගෙන ආසන 89ක් දිනාගත් ඔවුන් වසර දෙකකට පසුව සිය ආසන සංඛ්‍යාව 142ක්  දක්වා වර්ධනය කර ගෙන තිබේ. මෙවර ඡන්ද ප්‍රතිශතය 37කි.  එය දැවැන්ත වර්ධනයකි, ඉදිරි පිම්මකි. 2017  මහ මැතිවරණයේ දී National Rally පක්ෂයට හිමි වූයේ ආසන 7ක් (සියයට 5.5) පමණි. හදිසි මැතිවරණයේ දී වමට සහ දකුණට විකල්පයක් වශයෙන් තම මධ්‍යවාදී දේශපාලන සන්ධානය ශක්තිමත් කර ගත හැකි වනු ඇතැයි යන්න ජනාධිපති මැක්‍රොන්ගේ තක්සේරුව විය. එහෙත් වසර 2022 මහ මැතිවරණයේ දී ආසන 237ක් (සියයට 37.7) දිනාගත් මැක්‍රොන්ගේ දේශපාලන සන්ධානයට මෙවර හිමිව ඇත්තේ ආසන 161ක් පමණි. ඔහුගේ මධ්‍යවාදී දේශපාලනය ප්‍රංශ ජනතාව යළිත් ප්‍රතික්ෂේප කර තිබේ . මැක්‍රොන්ගේ ජනප්‍රියත්වය ඉහළම මට්ටමේ පැවැති වසර 2017 දී පැවැති මහ මැතිවරණයේදී ඔහුගේ  පක්ෂය ආසන 350ක් දිනා ගත්තේ ය. වසර හතක කාලයේ දී එම බලය හරි අඩකටත් වඩා පහළ වැටී තිබේ .

යුරෝපා නායකයෝ තැති ගනිති!

පළමු වටයේ මැරීන් ලෙ පෙන්ගේ ජයග්‍රහණයෙන් වඩාත්ම බිය වූයේ  රුසියාවේ තර්ජනයට ලක්ව ඇති යුරෝපයේ ප්‍රජාතන්ත්‍රවාදී රටවල්ය. වර්තමාන යුරෝපා සංගමයේ එකම න්‍යෂ්ටික බලවතා වන ප්‍රංශයේ දේශපාලන බලය රුසියානු ඒජන්තයෙකු අතට පත්වීම පිළිබඳ ඔවුන් බියවීම පුදුමයක් නොවෙයි. එමෙන්ම ප්‍රංශ  ෆැසිස්ට් දක්ෂිණාංශික බලවේගයන්ගේ බලපෑම සමස්ත යුරෝපය පුරා පැතිරයෑමේ අනතුරක් පවතියි. පෝලන්ත අගමැති ඩොනල්ඩ් ටස්ක් අන්ත දක්ෂිණාංශික බලවේග ගැන “ඔවුන් අසීමිත ලෙස පුටින්ට, මුදලට සහ බලයට ආදරය කරයි. ඔවුන් දැනටමත් බලයේ සිටී.  එසේ නොමැති නම් යුරෝපයේ නැඟෙනහිර හෝ බටහිර ප්‍රදේශ වෙත ළඟා වෙමින් සිටී” යනුවෙන් අනතුරු ඇඟවීමක් කළේය.

පුටීන් ඒජන්තයන්ගේ අනතුරු ඇඟවීම…

ස්පාඤ්ඤයේ සමාජවාදී නායක, අගමැති පේද්‍රෝ සැන්චෙස්, ප්‍රංශ අන්ත දක්ෂිණාංශික ජයග්‍රහණය දකින්නේ ලොවටම සිදු කළ අනතුරු ඇඟවීමක් ලෙසය.  “ප්‍රංශයේ අන්ත දක්ෂිණාංශික ප්‍රගතිය, ස්පාඤ්ඤය ඇතුළුව – ලෝකයේ අනෙකුත් ප්‍රදේශවල සිදුවෙමින් පවතින දේ සමඟ සම්බන්ධයි”. ඔහුගේ තක්සේරුව ඉතා නිවැරදිය. අද ෆැසිස්ට්වාදය යුරෝපය ඇතුළු ලොව පුරා යළි මතුව ඇත්තේ හිට්ලර්ගේ හෝ මුසලෝනිගේ ක්‍රමවේදයන් අනුව නොවෙයි. එය වඩා සියුම් ප්‍රවේශයකි.

ෆැසිස්ට්වාදයට දරදිය අදින ඇමරිකානු ශ්‍රේෂ්ඨාධිකරණය..

දැනටමත් ජර්මනිය, බ්‍රිතාන්‍යය, නෙදර්ලන්තය, ඩෙන්මාර්කය, ස්වීඩනය, ස්පාඤ්ඤය ඇතුළු රටවල් ගණනාවක ෆැසිස්ට්වාදයේ අවතාර මතුව තිබේ. ලබන නොවැම්බරයේ ඇමරිකාව යළිත් වරක් ඩොනල්ඩ් ට්‍රම්ප්ගේ  ෆැසිස්ට් පාලනයට ගොදුරුවීමට නියමිතයි. පසුගිය වාරයට වඩා මෙවර එය වඩාත් භයානක විය හැක්කේ ඇමරිකානු ශ්‍රේෂ්ඨාධිකරණය මේ වන විටත් ඒ සඳහා නීතිමය ආවරණයන් සපයා ඇති බැවිනි. එදා හිට්ලර්ගේ ෆැසිස්ට් පාලනයට අවශ්‍ය නීත්‍යනුකූල ආවරණය සැපයූවේ ජර්මන් අධිකරණයයි.

මැරීන් ලෙ පෙන්ගේ පියා ආරම්භ කළ නාසි පක්ෂ..

මැරීන් ලෙ පෙන්ගේ ෆැසිස්ට් දක්ෂිණාංශික National Rally පක්ෂය ප්‍රංශ අනාගමික රාජ්‍යයට විරුද්ධ අතර ජාතිකවාදී ප්‍රංශයක් වෙනුවෙන් පෙනී සිටියි. ඔවුන් යුරෝපා සංගමයට විරුද්ධ ය.  සංක්‍රමණිකයන්ට විරුද්ධ ය. ඉස්ලාම් දහමට සහ මුස්ලිම් ජාතිකයන්ට මාරාන්තික විරෝධයක් දක්වයි. යුදෙව්වන් නයාට අඳු කොළ මෙනි. දෙවන ලෝක යුද්ධයෙන් පසුව ප්‍රංශ ෆැසිස්ට් දක්ෂිණාංශික පක්ෂය ආරම්භ කළේ මැරීන් ලෙ පෙන්ගේ පියා වන ජීන්-මරී ය. ඔහු පැරණි නාසි ෆැසිස්ට්වාදියෙකි. හිට්ලර් ප්‍රංශය යටත් කර ගැනීමෙන් පසුව හිට්ලර් සමඟ සහයෝගයෙන් රට පාලනය කළ ප්‍රංශ ෆැසිස්ට්වාදීන් රාශියක් ජීන්-මරී ආරම්භ කළ Front National පක්ෂයේ ප්‍රධාන නායකයෝ වූහ. ඔවුහු නාසි පාලනය මෙන්ම නාසි සමූල ඝාතනයන් ප්‍රසිද්ධියේ සාධාරණීකරණය කළහ.

ෆැසිස්ට් ඉතිහාසය සැඟවීම..

වසර 2011 දී මැරීන් ලෙ පෙන් Front National පක්ෂයේ නායකත්වයට පත් වූවාය. අපකීර්තිමත් නාසි ෆැසිස්ට්වාදි ඉතිහාසයෙන් සිය පක්ෂය බේරා ගැනීම සඳහා සිය පියාව පක්ෂයෙන් නෙරපා හැරීමට මැරීන් ලෙ පෙන් වසර 2015 දී තීරණය කළාය. වසර 2018 දී ඇය පියාගේ පක්ෂයේ නම වෙනස් කර ෆැසිස්ට් ඉතිහාසය සැඟවීමට උත්සාහ කළාය. එහෙත් අදටත් National Rally පක්ෂයේ ෆැසිස්ට් පදනම ඉවත්වී නොමැත. ඔවුන්ගේ මෙවර මැතිවරණ අපේක්ෂකයෙක් වන ජෝසෆ් මාටින් ප්‍රසිද්ධියේ කියා සිටියේ “ගෑස්, සමූලඝාතනයට ගොදුරු වූ යුදෙව්වන්ට සාධාරණය ඉටු කළ බවයි”. එහෙත් එම අපේක්ෂකයා පිළිබඳ විනය ක්‍රියාමාර්ගයක් ගැනීමට මැරීන් ලෙ පෙන් හෝ එම පක්ෂ නායකයෝ ඉදිරිපත් නොවූහ. මෙවැනි සිද්ධි සියයකට වැඩි ප්‍රමාණයක් ප්‍රංශ මැතිවරණ නිරීක්ෂණ සංවිධාන විසින් වාර්තාගත කර තිබේ. ලෙ පෙන්ලා කැලේ මාරු කලාට ඔවුන්ගේ පුල්ලි මාරුවී නැත.

මැරීන් ලෙ පෙන්ගේ පුටීන් වන්දනාව..

මැරීන් ලෙ පෙන් මෙන්ම National Rally පක්ෂය රුසියානු ඒකාධිපතියා වන පුටීන්ව වීරයෙකු සේ සළකයි. වසර 2014 දී පුටීන් යුක්රේනයේ ක්‍රිමියාව ආක්‍රමණය කළ අවස්ථාවේ මැරීන් ලෙ පෙන් එම ආක්‍රමණ අනුමත කරමින් එය සාධාරණීකරණය කළාය. වසර 2022 පෙබරවාරියේ පුටීන් යුක්රේනය ආක්‍රමණය කළ අවස්ථාවේ පවා ඇය එම සිද්ධිය හෙළා දැක්කේ නැත. යුක්රේනය ආක්‍රමණයට එරෙහිව යුරෝපා සංගමය රුසියාවට සම්බාධක පැනවූ අවස්ථාවේ මැරීන් ලෙ පෙන් එම ක්‍රියාමාර්ගයට දැඩිව විරෝධය පල කළාය. මැරීන් ලෙ පෙන්ගේ ප්‍රධාන ගෝලයා වශයෙන් සැළකෙන ජෝර්දාන් බාර්ඩෙලා  (අගමැති අපේක්ෂකයා) යුක්රේනය ආක්‍රමණය හෙළා දැකීමේ යුරෝපා පාර්ලිමේන්තු යෝජනාවට පවා විරුද්ධව ඡන්දය ප්‍රකාශ කළේ ය.

පුටීන්ගෙන් යුරෝ මිලියන 9.4ක මූල්‍ය ආධාර…

මැරීන් ලෙ පෙන් මෙන්ම National Rally පක්ෂයට පුටීන්ට විරුද්ධ විය නොහැකිය. ඔවුන් ප්‍රංශයේ දේශපාලනය කරන්නේ පුටීන්ගේ මූල්‍ය අනුග්‍රහයෙනි. වසර 2014 දී මැරීන් ලෙ පෙන් සිය පක්ෂයේ දේශපාලන කටයුතු සඳහා First Czech-Russia නම් පුටීන්ට සම්බන්ධතා පවතින රුසියානු බැංකුවෙන් යුරෝ මිලියන 9.4ක ණය මුදලක් ලබා ගත්තා ය. පුටින් සහ රුසියාව වෙනුවෙන් සිදු කරන සේවය වෙනුවෙන් මේ ණය මුදල ලෙ පෙන්ට ලබාදෙන ලෙසට රුසියානු බලධාරීන්  බැංකුවට නියෝග කළ බව Financial Times පුවත්පත වාර්තා කර තිබිණ. මැරීන් ලෙ පෙන්ගේ පුටීන් “භක්තිය”අසීමිතය. වසර 2017 ප්‍රංශ ජනාධිපතිවරණයට තරඟ කළ ඇය, පුටීන්ගේ “ආශීර්වාදය” ලබා ගැනීමට තකහනියේ රුසියාවට ගියාය. ඇය කිසිවිටෙක පුටීන් රුසියාව තුළ  ගෙන යන ඒකාධිපති පාලනය, ඔහු ස්වාධීන රටවල් ආක්‍රමණය කිරීමට දරන උත්සාහයන්,  ප්‍රජාතන්ත්‍රවාදී පාලනයන් විනාශ කිරීමට සිදුකරන කුමන්ත්‍රණ පිළිබඳ වචනයක විරෝධයක් දක්වන්නේ නැත.

හඬ ලෙ පෙන්ගේ අත පුටීන්ගේ…

ප්‍රංශ මහ මැතිවරණයේ දෙවන වටයට පෙර, එනම් ජූලි 3 වන දා රුසියානු විදේශ අමාත්‍යාංශය සිය නිළ සමාජ මාධ්‍ය හරහා මැරීන් ලෙ පෙන්ගේ National Rally පක්ෂයට ඡන්දය ලබාදෙන ලෙසට මෙසේ ප්‍රංශ ඡන්දදායකයන්ට ආයාචනය කළේ  ලෙ පෙන්ගේ ඡායාරූපයක් ද පලකරමිනි “The people of France are seeking a sovereign foreign policy that serves their national interests & a break from the dictate of Washington & Brussels”. රුසියානු විදේශ අමාත්‍යාංශයේ නියෝජ්‍ය ප්‍රකාශක  Andrey Nastasin එම ප්‍රකාශයට අත්සන් තබා තිබිණ. හඬ මැරීන් ලෙ පෙන්ගේ වුවද අත පුටීන්ගේ බව දැන් පැහැදිලිය.  National Rally පක්ෂ ආණ්ඩුවක් යටතේ යුක්රේනයට අවි ආයුධ සැපයීම වහාම නවතා දමන බව මැරීන් ලෙ පෙන් දැනටමත් සහතික වී අවසානය.

ප්‍රායෝගිකවාදය යනු හුදු අවස්ථාවාදයයි..

හිට්ලර් ප්‍රංශ ආක්‍රමණය කළ අවස්ථාවේ ප්‍රංශ ෆැසිස්ට්වාදීහූ හිට්ලර් සමඟ එක්ව වසර තුනක් ආණ්ඩු කළහ. ඒ අදින් දශක අටකට පෙරය. එමානුවෙල් මැක්‍රොන් එම ෆැසිස්ට්වාදීන් නැවත බලය ආසන්නයට කැඳවා තිබේ. නිශ්චිත දේශපාලන ප්‍රතිපත්තියකින් තොර ජනකාන්තවාදී, ජනප්‍රිය දේශපාලනය ලොවටම සිදු කළ හැකි හානියට හොඳම නිදසුන මැක්‍රොන්ගේ ප්‍රංශයයි.  ප්‍රායෝගිකවාදය යනු හුදු අවස්ථාවාදය මිස දේශපාලන දර්ශනයක් නොවෙයි.

-ආනුභාවනන්ද, [email protected]  – lankaenews වෙතිනි

Archive

Latest news

Related news