නීති සම්පාදනය කිරීමට පෙර මාර්ගගත ආරක්ෂණ පනතට පුළුල් සංශෝධන සිදු කරන ලෙස රජයෙන් ඉල්ලා සිටින Amazon, Apple, Booking.com, Expedia Group, Google, GoTo, Grab, LINE, LinkedIn, Meta, Rakuten, X සහ Yahoo වැනි ප්‍රධාන තාක්ෂණික සමාගම් නියෝජනය කරන “ආසියානු අන්තර්ජාල සංසදය” Asia Internet Coalition (AIC), ශ්‍රී ලංකාවේ අන්තර්ජාල ආරක්ෂණ පනත් කෙටුම්පත ගැන දැඩි කනස්සල්ල පළ කරයි.
මෙම පනත රනිල් රාජපක්ෂගේ සමස්ත මර්දනකාරී සැළැස්මේ ප්‍රධාන අවියකි.
ශ්‍රී ලංකාව ලෝකය සමඟ එක්කරන බවට පාරම්බාන රනිල් රාජපක්ෂගේ සැළැස්ම වන්නේ රට විදේශ ජාවාරම්කරුවන්ට විවෘත කරන අතර දේශීය ව්‍යවසායකයින් මෙන්ම මහා ජනයාගේ මූලික අයිතීන් යටපත් කිරීම බව මෙමගින් යළිත් පැහැදිළි වෙයි.
රනිල් රාජපක්ෂගේ දේශපාලන අප්පච්චි වන ජේ.ආර්.ජයවර්ධන උත්සාහ කළේද මෙවැනිම ප්‍රතිවිරෝධී සංවර්ධන උපාය මාර්ගයකි. ඔහු කල්පනා කලේ දෙමළ ජනයා මර්දනය කර රට සංවර්ධනය කළහැකි යැයි කියාය. අන්තිමේදී ඔහු රට ගිනි ජාලාවකට ඇද දැම්මේ ඉන්දියානු හමුදාවන්ට රට විවෘත කරමිනි.
ඒ අතින් රනිල් රාජපක්ෂ ඒ අතින් ඉන්නේ ජේ.ආර්.ටත් පහලිනි. මහජන ආරක්‍ෂක ඇමති ටිරාන් අලස් යනු වධකයිින් සහ දූෂිතයින්ට පොලිසිය බාර දී ඇති, එල්ටීටීඊයට කප්පම් ගෙවූ අපරාධකරුවෙකි.
ටිරාන් අලස් වෙත ලිපියක් යවන ඉහත සදහන් කළ “ආසියානු අන්තර්ජාල සංසදය” AIC අනතුරු අඟවන්නේ, “යෝජිත නීති සම්පාදනය, එහි වර්තමාන ස්වරූපයෙන්, පුළුල් ලෙස ආමන්ත්‍රණය නොකළහොත්, ශ්‍රී ලංකාවේ ඩිජිටල් ආර්ථිකයේ විභව වර්ධනය අඩාල කළ හැකි, සැලකිය යුතු අභියෝග මතුකරන” බවයි.
එම ලිපියට අමතරව, මෙම පනත ගැන සිය අදහස් දක්වමින් දිර්ඝ සංදේශයක් ඉදිරිපත් කරන එම සංසදය එහිලා මෙසේ දක්වයි:
“තහනම් ප්‍රකාශයන් පිළිබඳ පුළුල් සහ අපැහැදිලි අර්ථ දැක්වීම:
පනත් කෙටුම්පත (III කොටස) පුළුල් සහ නොපැහැදිලි අර්ථ දැක්වීම් සහිත පුළුල් පරාසයක අපරාධ ගෙනහැර දක්වයි.
එවැනි පුළුල් නිර්වචන ජාත්‍යන්තර මානව හිමිකම් ප්‍රමිතීන්ට නොගැලපෙන අතර ශ්‍රී ලංකාව අනුමත කර ඇති සිවිල් සහ දේශපාලන අයිතිවාසිකම් පිළිබඳ ජාත්‍යන්තර සම්මුතියේ (ICCPR) දක්වා ඇති පරිදි අවශ්‍යතාවය සහ සමානුපාතිකත්වය පිළිබඳ පරීක්ෂණයෙන් අසමත් වේ.
එවැනි පුළුල් හා අපැහැදිලි නිර්වචන නීත්‍යානුකූල කථනය යටපත් කිරීම සඳහා රජයන් විසින් නීතිය අනිසි ලෙස භාවිතා කිරීමට පෙළඹේ. තවද, පුළුල් සහ අපැහැදිලි නිර්වචන උසාවි සහ නියාමන බලධාරීන් විසින් නීතියේ අදාළ කර ගැනීමේ දී අනපේක්ෂිත බව සහ නොගැලපීම් ඇති කරයි. අන්තර්ගතයේ නීත්‍යානුකූලභාවය කාර්යක්ෂමව සහ ඵලදායී ලෙස තක්සේරු කිරීමට සමාගම්වල ඇති හැකියාව වළක්වයි.
අන්තර් ජාල වේදිකාවන් කෙරෙන් අනත්ර්ගතයන් ඉවත් කරන සේ කැරෙන ඉල්ලීම්වල ප්‍රමාණවත් ලෙස ප්‍රතිචාර දැක්වීමට ඉඩ සැලසීම සඳහා තහනම් අන්තර්ගතය පිළිබඳ පැහැදිලි, පටු සහ නිරවද්‍ය නිර්වචන අවශ්‍ය වේ. මන්ද යත් එවැනි ඉවත් කිරීම් කළ යුත්තේ ප්‍රකාශනයේ නිදහස සඳහා වන මූලික අයිතිවාසිකම්වලට ගරු කරමින් නීති විරෝධී අන්තර්ගතයන් ඉලක්ක කර ගැනීම සඳහා මෙම නීතිය ප්‍රවේශමෙන් සකස් කර ඇති බවට මෙම වේදිකාවලට සහ මහජනතාවට සහතික වන පරිදි නිසාය.”
ටිරන් අලස් වෙත ආමන්ත්‍රණය කරන ලද ලිපියෙහි මෙසේ ද සඳහන් වේ.
“සාකච්ඡා සිදුවෙමින් පවතන බවත් ව්‍යවස්ථාදායක ක්‍රියාවලිය සංකීර්ණ බව අපි පිළිගනිමු කෙසේ වෙතත්, පනත් කෙටුම්පත ඵලදායී වනවා පමණක් නොව එහි විෂය පථය සහ ප්‍රවේශය තුළ සමබර, සමානුපාතික සහ ප්‍රායෝගික බව සහතික කිරීම ඉතා වැදගත් වේ. යෝජිත නීති සම්පාදනය, එහි වර්තමාන ස්වරූපයෙන්, පුළුල් ලෙස ආමන්ත්‍රණය නොකළහොත්, ශ්‍රී ලංකාවේ ඩිජිටල් ආර්ථිකයේ විභව වර්ධනය අඩාල කළ හැකි සැලකිය යුතු අභියෝග මතු කරයි. මෙහි අමුණා ඇති AIC හි සංදේශය, නියාමන ස්වාධීනත්වය, තහනම් ප්‍රකාශ නිර්වචනය කරන අපැහැදිලි පාරිභාෂිතය, ජාත්‍යන්තර මානව හිමිකම් සහ හොඳම භාවිතයේ ප්‍රමිතීන්ගෙන් අපසරනයවීම සහ තවත් බොහෝ දේ දක්වා විශේෂිත වගන්තිවල විවිධ ක්ෂේත්‍ර ඉස්මතු කරයි.
“ශ්‍රී ලංකාවේ ජාත්‍යන්තර මානව හිමිකම් කැපවීම්වලට අනුකූලව, පනත් කෙටුම්පත ශ්‍රී ලංකාවේ නිදහස් අදහස් ප්‍රකාශ කිරීමේ මූලික අයිතිය ඇතුළු මානව හිමිකම් ආරක්ෂා කිරීම සහ ගරු කිරීම පිළිගෙන සහතික කළ යුතුය. අදහස් ප්‍රකාශ කිරීමේ අයිතියට ඇති සීමා කිරීම් නීත්‍යානුකූල, සමානුපාතික සහ අවශ්‍ය විය යුතු අතර පහත සඳහන් සාධක සැලකිල්ලට ගත යුතුය
“ශ්‍රී ලංකා රජය සමඟ අන්තර්ජාල කර්මාන්තයේ අඛණ්ඩ සම්බන්ධතාවේ කොටසක් ලෙස, කරුණාකර මෙම ලිපියට සම්බන්ධ ප්‍රධාන කරුණු සහ නිර්දේශයන් සැළකිල්ලට ගන්න. AIC හි අදහස වන්නේ හුදෙක් වගන්තියෙන් වගන්තිය සංස්කරණය කිරීම මගින් කෙටුම්පත් කෙටුම්පතේ අප හඳුනාගෙන ඇති විශාල ගැටළු වලට ප්‍රමාණවත් ලෙස විසඳුම් ලබා නොදෙන බවයි. පුළුල් සංශෝධන නොමැතිව යෝජිත නීති ක්‍රියාවට නැගීමට නොහැකි වනු ඇතැයි අපි තරයේ විශ්වාස කරමු.
“යෝජිත මාර්ගගත ආරක්ෂණ පනත් කෙටුම්පතේ ආර්ථික ඇඟවුම් අධිතක්සේරු කළ නොහැක. ශ්‍රී ලංකාවේ ඩිජිටල් පරිසර පද්ධතිය සැලකිය යුතු වර්ධනයක පාමුල සිටින අතර නවෝත්පාදන සහ ආයෝජන දිරිමත් කරන පරිසරයක් පෝෂණය කිරීම අත්‍යවශ්‍ය වේ. සාපරාධී වගකීම්, ආරක්ෂිත විධිවිධාන (safe harbor provisions,), හැරවුම් කාලය, පරිශීලක දත්ත ප්‍රවේශය සහ පනතේ අනෙකුත් තීරණාත්මක අංශ සම්බන්ධයෙන් අපගේ සංදේශයෙහි උත්සුකයන් වත්මන් කෙටුම්පත නැවත සලකා බැලීමේ හදිසි අවශ්‍යතාව අවධාරණය කරයි.
“එවැනි නීති කෙටුම්පත් කිරීමේ සංකීර්ණත්වය අපි තේරුම් ගන්නා අතර සබැඳි ආරක්ෂාව පිළිබඳ ගැටළු විසඳීමේ වැදගත්කම පිළිගනිමු. එබැවින්, අන්තර්ජාල ආරක්ෂණ පනත් කෙටුම්පත පරිශීලකයින් ආරක්ෂා කිරීම සහ ඩිජිටල් නවෝත්පාදනය සඳහා හිතකර පරිසරයක් පෝෂණය කිරීම අතර සමතුලිතතාවයක් ඇති කිරීම සහතික කිරීම සඳහා මෙම අඛණ්ඩ සහයෝගී ප්‍රවේශය අත්‍යවශ්‍ය වේ. ගෝලීය හොඳම භාවිතයන් සමඟ සමපාත වන වඩාත් ක්‍රියාකාරී සහ ඵලදායී මාර්ගගත ආරක්ෂණ පනත් කෙටුම්පතක් නිර්මාණය කිරීම සඳහා ශ්‍රී ලංකා රජය සමඟ කටයුතු කිරීමට අපි කැපවී සිටිමු.
මීට අමතරව, අන්තර්ජාල ආරක්ෂාව සහ වගකීම් සහිත අන්තර්ගතය (“කේතය”) සඳහා පුළුල් ශ්‍රී ලංකා පුහුණු සංග්‍රහයක් (“කේතය”) සංවර්ධනය කිරීම සඳහා AIC අතීතයේ දී ශ්‍රී ලංකාවේ දේශීය පාර්ශවකරුවන් සමඟ ක්‍රියාකාරීව සම්බන්ධ වී ඇත. මෙම සහයෝගී ප්‍රයත්නය තුළින් ලබා ගත් විශේෂඥතාව සහ තීක්ෂ්ණ බුද්ධිය මත පදනම්ව, කේතයේ අදාළ අංග සලකා බලා වත්මන් පනතට ඒකාබද්ධ කළ හැකි බව නිර්දේශ කෙරේ. මෙම සහයෝගිතා සහ ඇතුළත් ප්‍රවේශය පනත් කෙටුම්පතේ සඵලතාවය තවදුරටත් ඉහළ නංවන අතර, ශ්‍රී ලංකාවේ අන්තර්ජාල ආරක්ෂණ ගැටළු විසඳීම සඳහා සසෑම අංශයක්ම ආවරණය වන මනා වටකුරු සහ ගෝලීය වශයෙන් දැනුවත් රාමුවක් සහතික කරයි.
අපගේ සංදේශයෙහි කිරීමෙහි පෙන්වා දී ඇති කරුණු පිළිබඳව ශ්‍රී ලංකා රජයෙන් තරයේ සලකා බලන ලෙස අපි කාරුණිකව ඉල්ලා සිටිමු. මාර්ගගත ආරක්ෂණ පනත් කෙටුම්පත පිළිබඳ වැඩිදුර උපදේශන සහ අර්ථවත් සංවාදවල නිරත වීමට අපි බලාපොරොත්තු වෙමු.”
සංදේශය ඉංග්‍රිසි බසින්: asia-internet-coalitions-submission-for-the-online-safety-bill-osb_8-jan-2024 (1)
පසු සටහන: මෙම භයානක පනත පිළිබඳව මෙරට ජනයා අතර ඇති අවබෝධය ඉතාම පහළ මට්ටමක බව වෙරිටේ මත විචාරණයකින් හෙළි වී තිබේ. එම පනත ගැන දැන සිටියේ සියයට 34ක් පමණක් වන අතර පනත සමාජ මාධ්‍ය භාවිතයට බාධාවක් වනු ඇතැයි අදහස් කලේ එම සියයට 34න් සියයට 54ක් පමණි. එනම් ජනගහනයෙන් සියයට 18කි. මෙයින් පෙන්නුම් කරන්නේ මෙම පනත පිළිබඳව පුළුල් මතවාදී ව්‍යාපාරයක අවශ්‍යතාවයයි.
සුනන්ද දේශප්‍රිය විසිනි.
16.01.24