මාධ්‍ය ඇමති සහ නිද්හස් මාධ්‍ය අතර හමුවක්: “ස්වාධීන හා වගකීම් සහගත ජනමාධ්‍යකරණයක් සඳහා බහුපාර්ශවීය වැඩසටහනකට කැමැත්ත”

ස්වාධීන හා වගකීම් සහගත ජනමාධ්‍යකරණයක් උදෙසා සියළු පාර්ශව සහභාගි වන වැඩපිළිවෙලකට ආණ්ඩුව එකඟයි – ඇමති නලින්ද නිදහස් මාධ්‍ය ව්‍යාපාරය හා සාකච්ඡාවේදී කියයි.

ජනමාධ්‍යවේදීන්ට සහ ජනමාධ්‍ය ආයතනවලට එරෙහිව පසුගිය කාලය තුළ සිදු වූ අපරාධවලට අදාළව යුක්තිය ඉටු කිරීමේ ක්‍රියාවලිය යම් යම් හේතු නිසා මන්දගාමී සහ අකර්මන්‍ය තත්වයකට පත්ව ඇති බව පිළිගන්නා අතර නව රජය නිදහස් මාධ්‍ය ව්‍යාපාරය ඇතුළු මාධ්‍ය සංවිධානවල ප්‍රධාන ඉල්ලීමක් වන අධිකරණ ක්‍රියාමාරග නැවත ආරම්භ කිරීමට අවශ්‍ය සෑම පියවරක්ම ගන්නා බව ජනමාධ්‍ය සහ සෞඛ්‍ය ඇමති නලින්ද ජයතිස්ස මහතා (ජනවාරි 08වන දින) ප්‍රකාශ කළේය.

පාර්ලිමේන්තුවේ සභා නායක කාර්යාලයේදී ජනවාරි 8 වන දා නිදහස් මාධ්‍ය ව්‍යාපාරය හා සාකච්ඡාවකට එක් වූ අමාත්‍යවරයා සඳහන් කළේ, මාධ්‍යවේදී ලසන්ත වික්‍රමතුංග ඝාතනයෙන් වසර 16 ක් ගෙවුණු දිනෙක එවැනි සාකච්ඡාවකට අවතීර්ණය වෙන්නට ලැබීම විශේෂත්වයක් ගන්නා බවයි.

මූලික කරුණු 6 ක් ඔස්සේ මෙම සාකච්ඡාවට එළඹෙමින් ශ්‍රී ලංකාවේ ජනමාධ්‍ය ක්ෂේත්‍රය ස්වාධීන සහ පුළුල් ප්‍රතිසංස්කරණවලට යොමු විය යුතු අන්දම නිදහස් මාධ්‍ය ව්‍යාපාරය මෙම සාකච්ඡාවේදී අවධාරණය කරන ලදී.

අපරාධවල වින්දිතයින් බවට පත් වූ මාධ්‍යවේදීන් සහ ඔවුන්ගේ පවුල්වල සාමාජිකයින් වෙනුවෙන් යුක්තිය ඉටු කිරීම සඳහා පවතින බාධක හදුනා ගැනීමට රජය ක්‍රියාකළ යුතු බවද, ඒ සඳහා අවශ්‍ය සහාය නොපැකිලව ලබා දෙන බවද, නිදහස් මාධ්‍ය ව්‍යාපාරය අවධාරණය කරන ලදී.

පසුගිය කාලයේ සම්මත කරන ලද සහ දැනට කෙටුම්පත් කර ඇති මාර්ගගත ක්‍රමවල සුරක්ෂිතභාවය පිළිබඳ පනත, ප්‍රති ත්‍රස්ත පනත් කෙටුම්පත, විද්‍යුත් විකාශන නියාමන කොමිෂන් සභා පනත් කෙටුම්පත වැනි ප්‍රකාශනයේ නිදහසට බලපාන සහ මර්ධනකාරී නීති නැවත සමාලෝචනය කිරීමටද, අයිසීසීපීආර් වැනි නීති අවභාවිතය වළක්වාගැනීම ආදිය පිළිබඳවද පුළුල් සහභාගිත්වයෙන් යුතු සාකච්ඡාවක් ගොඩනැගිය යුතු බව නිදහස් මාධ්‍ය ව්‍යාපාරය පෙන්වා දුන් අතර, අමාත්‍ය නලින්ද ජයතිස්ස මහතා සඳහන් කළේ විකල්ප අදහස් හා යෝජනාවලට සවන් දීමට රජය සූදානම් බවයි. විශේෂයෙන්ම මාධ්‍ය සංවිධාන අතර පිළිගැනීමට භාජනය නොවන පුවත්පත් මණ්ඩලය වැනි ආයතන අහෝසි කරන්නේ නම් වෙනුවට ස්ථාපිත වියයුතු වෙනත් ස්වාධීන ව්‍යුහ පිළිබඳ අදහස් ඉදිරිපත් කිරීමට අවකාශය ඇති බවද අමාත්‍යවරයා විසින් මෙහිදී පෙන්වා දෙනු ලැබීය.

මාධ්‍යකරණයේ ගුණාත්මක බව ප්‍රවර්ධනය සඳහා රජයේ සහයෝගය සහිත පුහුණු වැඩපිළිවෙලක් ගොඩනැගීමත්, මාධ්‍යවේදීන්ගේ වෘත්තීය අයිතිවාසිකම් ආරක්ෂාව සඳහා මැදිහත්විය යුතු ආකාරය පිළිබඳවත් මෙම සාකච්ඡාවේදී  පුළුල් ලෙස කතාබහට ලක් විය.

මාධ්‍යවේදීන්ගේ වරලත් ආයතනය පිහිටුවීම, ජාතික මාධ්‍ය ප්‍රතිපත්තිය වැනි කරුණු සම්බන්ධයෙන් අවසන් තීරණ ගැනීමට පෙර මාධ්‍ය සංවිධානවල සහ අනෙකුත් පාර්ශවවල අදහස් විමසීමට අමාත්‍යවරයා මෙහිදී එකඟ විය.

ජනමාධ්‍ය අමාත්‍යාංශයේ අතිරේක ලේකම් (සංවර්ධන, සැලසුම් හා තොරතුරු) කැළුම් විජේනායක මහතා, රජයේ ප්‍රවෘත්ති අධ්‍යක්ෂ ජනරාල් හර්ශ බණ්ඩාර මහතා ඇතුළු නිලධාරීහු පිරිසක් ද මෙම සකච්ඡාවට එක්ව සිටියහ.

නිදහස් මාධ්‍ය ව්‍යාපාරයේ මාධ්‍ය නිවේදනයකි.

2025/01/09/