ඔන්ලයින් ආරක්ෂණ පනත් කෙටුම්පත 2024 ජනවාරි 23 වන දින ශ්‍රී ලංකා පාර්ලිමේන්තුවට ඉදිරිපත් කිරීමට නියමිත බැවින් ඒ හරහා ශ්‍රී ලාංකිකයන්ගේ මානව හිමිකම් උල්ලංඝනය විය හැකි බවට කනස්සල්ල වර්ධනය වෙමින් පවතී. මෙම පනත් කෙටුම්පතට දේශීය හා ජාත්‍යන්තර විරෝධතා රැසක් ඉලක්කය වී ඇත.
විශේෂයෙන්ම, 2023 නොවැම්බර් 20 වන දින, යෝජිත ඔන්ලයින් ආරක්ෂණ පනත (ඔන්ලයින් ආරක්ෂණ පනත් කෙටුම්පත) සහ යෝජිත විකාශන නියාමන කොමිෂන් සභා පනත පිළිබඳව කනස්සල්ල පළ කරමින් එක්සත් ජාතීන්ගේ මානව හිමිකම් කවුන්සිලයේ විශේෂ ක්‍රියා පටිපාටි තුනකින් ශ්‍රී ලංකා රජයට ප්‍රකාශයක් ලැබුණි. එහෙත් අවාසනාවකට මෙන්, ශ්‍රී ලංකා රජය මෙම කිසිවකට සාධනීය ආකාරයෙන් ආමන්ත්‍රණය කර නොමැත.
ඒ අනුව අදහස් ප්‍රකාශ කිරීමේ සහ ප්‍රකාශ කිරීමේ අයිතිය ප්‍රවර්ධනය කිරීම සහ ආරක්ෂා කිරීම පිළිබඳ විශේෂ වාර්තාකරු – අයිරින් ඛාන් මහත්මිය (Ms. Irene Khan) සාමකාමීව රැස්වීමේ සහ සංගමයේ නිදහසේ අයිතිවාසිකම් පිළිබඳ විශේෂ වාර්තාකරු – ක්ලෙමන්ට් නියොලෙස්ස්සෝ වූලි මහතා (Mr. Clement Nyaletsossi Voule)"), පෞද්ගලිකත්වය සඳහා ඇති අයිතිය පිළිබඳ විශේෂ වාර්තාකරු ආනා බ්‍රයන් නූරේ මහත්මිය (Ms. Ana Brian Nougrères), යන මහත්ම මහත්මීන්ට මෙම පැමිණිල්ල පසුගිය ජනවාරි මස 8 වනදා යොමු කළේය.
ඔන්ලයින් ආරක්‍ෂක පනත් කෙටුම්පතට එරෙහිව ශ්‍රී ලංකා ශ්‍රේෂ්ඨාධිකරණයට පෙත්සම් 45ක් ලැබී ඇති අතර ඉන් වගන්ති 31ක් ව්‍යවස්ථා විරෝධී බව සොයා ගන්නා ලදී. ආණ්ඩුක්‍රම ව්‍යවස්ථා විරෝධී වගන්තිවල වෙනස්කම් සිදු කිරීමෙන් හෝ ව්‍යවස්ථා විරෝධී වගන්ති සමඟ වුවද විශේෂ බහුතරයකින් (තුනෙන් දෙකෙන්) සම්මත කිරීමෙන් පනත් කෙටුම්පත පාර්ලිමේන්තුවේ සරල බහුතරයකින් අනුමත කළ හැකි බව තීරණය කළේය. මෙමගින් තුනෙන් දෙකක පාර්ලිමේන්තු බහුතර ඒකාධිපති ආන්ඩුවට පුරවැසියන්ගේ මූලික අයිතිවාසිකම් නොසලකා හැරීමට අසීමිත බලයක් ලබාදේ.
මානව හිමිකම් ආරක්ෂකයින්, මාධ්‍යවේදීන්, නීතිවේදීන් සහ පුරවැසියන් වශයෙන්, ශ්‍රී ලාංකිකයන්ගේ භාෂණයේ සහ අදහස් ප්‍රකාශ කිරීමේ නිදහසට ඇති මෙම බරපතල උල්ලංඝනය අපි දැඩි ලෙස හෙළා දකිමු. බලයේ සිටින රජය පටු, පක්ෂග්‍රාහී සහ මර්දනකාරී මානසිකත්වයක් ප්‍රදර්ශනය කරමින් විවේචන යටපත් කිරීමට පියවර ගනිමින් සිටින බව පෙනේ.
ගජමිතුරන් සඟවාගෙන විරුද්ධත්වය මැඬලීමේ උත්සාහයේ යෙදෙන පාලකයෝ නීතියේ ආධිපත්‍යය අනතුරේ හෙළන අරාජික තත්ත්වයකට ඇද දමමින් සිටිති. අත්තනෝමතික ලෙස අත්අඩංගුවට ගැනීම්, පහරදීම් සහ තර්ජන කිරීම් සාමාන්‍ය දෙයක් බවට පත්ව ඇති අතර, මාධ්‍යවේදීන්, සමාජ ක්‍රියාකාරීන් සහ වෘත්තීය සමිති සාමාජිකයින් මූලික වශයෙන් එහි බර දරා සිටී. කනස්සල්ලට ප්‍රධාන මූලාශ්‍රයක් වන්නේ අපරාධ වාර්තා ඇති පුද්ගලයින් රාජ්‍ය පරිපාලනයට රිංගා ගැනීමයි. ශ්‍රේෂ්ඨාධිකරණය විසින් වරදකරු කරනු ලැබූ දේශබන්දු තෙන්නකෝන් මහතා වැඩබලන පොලිස්පතිවරයා ලෙස පත්කිරීමෙන් ඒ බව පෙන්නුම් කෙරේ.
සිවිල් ක්‍රියාකාරීන්, මාධ්‍යවේදීන්, නීතීඥයින් 21 දෙනෙකුගේ සහය ඇතිව මෙම පැමිණිල්ල එක්සත් ජාතීන්ගේ මානව හිමිකම් කවුන්සිලයේ විශේෂ ක්‍රියා පටිපාටි තුනකට යොමු කර ඇත්තේ මෙම තත්ත්වයන් සැලකිල්ලට ගනිමින් සියලු‍ම ශ්‍රී ලාංකික පුරවැසියන්ගේ මානව හිමිකම් ආරක්ෂා කිරීමේ උත්සාහයක් ලෙස ය.
ස්තූතියි,
චතුරංග එම්. ප්‍රදීප් කුමාර – මානව හිමිකම් ක්‍රියාකාරී
රසික ගුණවර්ධන – මානව හිමිකම් ක්‍රියාකාරී
ආසියානු මානවහිමිකම් කොමිසම
[email protected] / [email protected]
+94768079699 (රසික ගුණවර්ධන) / +94773538820 (චතුරංග එම්. ප්‍රදීප් කුමාර)
මාධ්‍ය නිවේදනයකි.,
2024.01.09
Letter to UNSPs:Urgent Appeal – Follow up Intervention Against the Passage of the Online Safety Bill in Sri Lanka – 08 Jan2024 (1)